जित सुनां मधा:

विराज कायस्थ

मतिनाया घा: थुलि स्या धका
छाय् थें जित सुनां मधा:
नुग:या स्या स: मिखाय् थ्वयाच्वन
मचायकं हे ल: जुया हायाच्वन

सुनां मथुगु थ्व जिगु नुग:या भाय् छं थुइगु गथे ?
ख्वबिं जागु थ्व जिगु मिखाय् म्हगस व दनदन छ्वल थथे
मतिनाया घा: थुलि पुइय: धका
छाय् थें जित सुनां मधा:
नुग:या स्या स: मिखाय् थ्वयाच्वन
मचायकं हे ल: जुया हायाच्वन

मिखाय् छंगु, जिगु मखु, मेम्हेसियागु हे किपा दु सखे !
म्हगसय् छंगु, जिगु मखु, मेम्हेसियागु हे पलाचिँ दु सखे !
मतिनाया घा: थुलि हिइस्से च्वं धका
छाय् थें जित सुनां मधा:
नुग:या स्या स: मिखाय् थ्वयाच्वन
मचायकं हे ल: जुया हायाच्वन

वाथावाथा कनाच्वन थ्व मन, छंगु स: न्योनेमदया गनं
तिमिलाया थ्यूगु ज: नं, जिगु नितिं ख्युँस्से जुयाच्वन थनं
मतिनाया चा थुलि ख्युउँस्से च्वं धका
छाय् थें जित सुनां मधा:
नुग:या स्या स: मिखाय् थ्वयाच्वन
मचायकं हे ल: जुया हायाच्वन

More Stories Like this