खर्बौं तकाया फय्गं समाचार
लुम्बिनीयात निगूत्या खर्ब
येँ (सन्ध्या टाइम्स)/विश्वया बौद्ध धर्मावलम्बीतय् केन्द्र जुयाच्वंगु बुद्ध जन्मस्थल लुम्बिनी विकासया लागिं चीनया छगू संस्था २ खर्ब २५ करोड तका दां ग्वाहालि याइगु धकाः थौंकन्हय् अन्तर्राष्ट्रिय समाचार एजेन्सीतय्सं प्रवाह यानाच्वंगु छगू समाचार ब्वनाः नेपाःमित अजू चाःगु दु ।
बेलायतया समाचार एजेन्सी रोयटर्सं बिउगु उगु समाचारयात अनया नांजाःगु पत्रिका 'टेलिग्राफं' नं बांलाक हे थाय् बियाः प्रकाशन याःगु खः। वयां लिपा नेपाःया छुं पत्रिकातय्सं नं थ्व समाचार च्वगु दु ।
तर लुम्बिनीया लागिं अपाय्धंगु ग्वाहालि वइ धाःगु उगु खँ बारे धाःसा नेपाःया सम्बन्धित निकायत हे अनभिज्ञ जुयाच्वंगु दु। संस्कृति मन्त्रालयया उपसचिव जलकृष्ण श्रेष्ठं पत्रिकाय् अज्याःगु समाचार वःसां छुं नं संस्थां आः तक लुम्बिनीइ उलिमछि दां लगानी यायेगु धकाः सरकारयात छुं हे धाः मवःनिगु खँ कनादीगु दु ।
अथे हे स्वयम् लुम्बिनी विकास कोषं नं थःपिंत अज्याःगु ग्वाहालि बारे छुं जानकारी तकं मवःनिगु खँ धाःगु दु। कोषया सदस्य सचिव राजेन्द्र थापामगरं पत्रिकाय् अज्याःगु समाचार पिहां वयेवं थःपिं हे उकिया बारे बुझे यानाच्वनागु खँ म्हिगः बहनी प्रशारित बीबीसी नेपाली सेवायात कनादीगु दु ।
दकलय् न्ह्यइपुगु खँ ला छु धायेबलय् थ्व दां लगानी यायेगु न्ह्यःने वःगु संस्थाया नां एसियन प्यासिफिक एण्ड को-अपरेशन फाउन्डेशन धाःगु संस्था खः गुकिया उपाध्यक्ष एनेकपा (माओवादी) या अध्यक्ष प्रचण्ड खः। प्रचण्डया संस्थां अज्याःगु ग्वाहालि यायेत्यंगु खः ला धइगु न्ह्यसःया लिसलय् प्रचण्डलिसे सतीम्ह नेता वर्षमान पुनं न्हिलाः धयादिल, 'करोड जूसा ला पत्याः नं याये फइ धाये, थ्व ला खर्बया खँ जुल ....।'
फाउन्डेशनपाखें वइगु उगु दां लुम्बिनीइ विमानस्थल, सञ्चार, लः, मत, धः, होटल, सम्मेलन केन्द्र आदि निर्माणया ज्याय् छ्यलेगु जुइ धकाः समाचारय् धयातःगु खः ।
