विमानस्थलया रनवे स्यनाः अन्तर्राष्ट्रिय उडान अबरुद्ध
येँ (सन्ध्या टाइम्स)/त्रिभुवन अन्तर्राष्ट्रिय विमानस्थलया रनवे हाकनं दुनावंगु दु। थुकिं यानाः थौं सुथय् ८ बजेनिसें फुक्कं अन्तर्राष्ट्रिय उडान अवरुद्ध जूगु दु। श्रोतं धाः कथं रनवे दुना वंगुलिं अन्तर्राष्ट्रिय उडान बन्द जूसां आन्तरिक उडानया नितिं १००९ मिटर रनवे चायेकूगु दु ।
रनवेया इन्टेल सेक्सन ३ व ४ या दथुया ब्व दुनावंगु खः। छवाः न्ह्यः नं विमानस्थलय् उगु हे थासय् इन्टेल सेक्सन ४ निसें ५ तक थ्यंमथ्यं ९ मिटर रनवे प्वाः गनाः दुनावंगु खःसा उकिं यानाः नं उडान अवरोध जूगु खः। सूत्रं धाः कथं वंगु २० न्हुया दुने जक विमानस्थलया रनवे प्यक्वः दुना वनेधुंकूगु दु ।
विमास्थलया स्रोतं बिउगु जानकारी ताः ई न्ह्यवंनिसें हे त्रिभुवन अन्तर्राष्ट्रिय विमानस्थलय् रनवे स्यनीगु घटना जुयाच्वंगु दु। तर रनवे स्यंसां उकियात दुने दुनें हे गोप्य यानातःगु दु। रनवे स्यनाः थौं सुथय् कतार एरवेज व जेट एयरवेजया उडान डाइभर्ट याना छ्वःगु दु। नेपालं जुइमाःगु उडान धाःसा दिनाच्वंगु दु ।
