दाजु व तताःजुया हत्या लिपा थम्हं नं आत्महत्या
येँ (सन्ध्या टाइम्स)/सर्लाहीया जिल्लाय् थौं सुथय् छम्हेस्यां थः दाजु व तताःजुया हत्यायाना लिपा आत्महत्या याःगु दु। थौं सुथन्हापां राजघाट १ या बुँइ अनया प्रकाश माझी व कलाम्ह रीतादेवी माझी ज्या यानाच्वंगु खःसा उगु हे इलय् आकाझाकां पा ज्वनावंम्ह प्रदिप माझीं ३५ दँया थः दाजु प्रकाश माझी व तताःजु रीतादेवीयात पां पालाः हत्या याःगु खः ।
इमित हत्या याये धुंकाः विष नयाः प्रदिपं नं आत्महत्या याःगु खः धकाः राजघाट प्रहरी चौकीया सहायक निरीक्षक चनद्रबहादुर श्रेष्ठं संचारकर्मीतय्त जानकारी बियादीगु दु। विष सेवन याःगु छुं ई लिपा हे प्रदिप सीगु खः धकाः नं प्रहरीं धाःगु दु ।
छुं दिं न्ह्यःनिसें दाजु ततःजु व प्रदीपकया दथुइ पैतृक सम्पतीया सवालय् विवाद जुयाः वयाच्वंगु जुयाः अथे अंशया बारे हे कचमच जुयाः अज्वःगु घटना जूगु खयेमाः धकाः अनुमान याःगु दु। उगु घटनायात कयाः प्रहरीं अनुसन्धान यानाच्वंगु दु ।
