नेवाः ल्याः अप्वयेकेत क्लबत सक्रिय
येँ (सन्ध्या टाइम्स)/नेवाः जागरण मञ्चं जनगणनाया निंतिं म्हिगः येँ दुनेया थीथी क्लबत लिसे छगू ज्याझ्वः यात ।
झिदँय् छक्वः जुइगु जनगणनाय् पाय्छिकथं नेवाःतय् तथ्यांक मवल धाःसा नेवाः जाति लिउने लाइगु जूगुलिं आः जुया च्वंगु जनगणनाय् सुं नं नेवाःत त्वःमफीमा धइगु ल्याखं क्लब व संघसंस्थात सक्रिय रुपं न्ह्यायेमाःगु खँ मञ्चया संयोजक सुजीव बज्राचार्य तयादीगु खः ।
केन्द्रीय तथ्यांक विभाग जनसंख्या महाशाखा प्रमुख ज्ञानेन्द्र वज्राचार्यं असार ३ गतेनिसें १३ गते तक जुइगु जनगणनाय् विशेषतः दुनेया शहरय् छुटे जुइफुगु सम्भाव्यता दुगु बहाः, चुक, ननि, यक्व दुगुलिं थःथःगु थासय् वइपिं गणकतय्त ग्वाहालि यायेत इनाप यानादिल ।
ज्याझ्वलय् असन सेवा समिति, भोताहिति बजार समिति, गंगा क्लब, मच्छिन्द्र क्लब, स्टार क्लब, मरुत्वाः पुचः, लगं खलः, ज्याःबहाः ल्याय्म्ह पुचः, जैशीदेवल युथ क्लब, क्षेत्रपाटी क्लब, सिमिक युवा परिवारया प्रतिनिधि उपस्थित जूगु खः ।
जनगणनाय् नेवाःत त्वःमफिकेया नितिं तत्काल प्रचारात्मक ज्याझ्वःकथं एसएमएस छ्वयेगु, गुगु वडा गुम्ह गुणकत वयाच्वंगु खः, उपिंनाप क्लबया प्रतिनिधित त्वालय् त्वालय् चाःहिलेगु व थःथःगु लागाय् प्रचार माइकिङ यायेगु खँय् फुक्क क्लबत सहमत जूगु खः। नेवाः जागरण मञ्चं म्हिगःनिसें प्रचारया नितिं स्वनिगः दुने माइकिङ यायेधुंकूगु दु ।
