नवदुर्गा द्यःया बारे एकल किपा ब्वज्या
येँ (सन्ध्या टाइम्स)/ख्वपया नांजाःगु नवदुर्गा प्याखंया ख्वाःपा दुने सुलाच्वंगु वास्तविक जीवन पद्धतियात कयाः ख्वपया उगु हे समुदायया ल्याय्म्ह कलाकार बालकृष्ण बनमालां तयार याःगु किपा ब्वज्या बबरमहलया नेपाल आर्ट काउन्सिल ग्यालेरीइ न्ह्यानाच्वंगु दु। ब्वज्याया उलेज्या नेमकिपाया अध्यक्ष नारायणमान बिजुक्छेँ रोहितं शनिवाः यानादीगु खः। उगु किपा ब्वज्याय् लिच्छली व मल्ल कालय् खनेदुगु सांस्कृतिक जीवन पद्धतियात ध्वाथुइकी कथंया थीथी पक्षयात कयाः कलाकार बनमालां किपात न्ह्यब्वयातःगु दु ।
झिंन्यापाः चित्रकला व निपाः प्रस्तर कला नं न्ह्यब्वया तःगु उगु ब्वज्या उलेज्या समारोहय् मूपाहां रोहितं नवदुर्गा गणया बारे थप अनुसन्धान यायेमाःगु खँ कनादिल। नापं संस्कृतिविद् प्रा. डा. पुरुषोत्तमलोचन श्रेष्ठ व वास्तुकलाविद् रविन्द्र पुरीपिंसं जीवित द्यः नवदुर्गा व बनमाला जातिया आवश्यकता ध्वाथुइकेमाःगु बारे थःथःगु नुगः खँ कनादिल। ब्वज्या वइगु विहिवाः तक न्ह्याइगु खँ कलाकार बालकृष्ण बनमालां कनादिल ।
