संसदया ख्वालय् हाकुगु धब्बा

व्यवस्थापिका संसदय् थःपिनि हक अधिकारया लागिं सः तयाच्वंपिं थीथी चीधंगु पार्टीया प्यम्ह सभासद्यात मार्शल लगे यानाः पितिना छ्वयेगु ज्या सभामुखं याःगु दु। गणतान्त्रिक संसदय् हे न्हापांखुसी सभासद्तय्त थथे मार्शल लगे यानाः निलम्बन यायेगु घटना जूगुलिं थ्व अथें नं चर्चाया विषय जुइगु जुल। तर समग्रय् धायेगु खःसा थ्व देशय् अझ नं सही अर्थया लोकतन्त्र मवःनि व जनतां थःगु हक स्थापित यायेगु खःसा सतकं हे संघर्ष यायेमाःगु जुयाच्वन, सतक संघर्ष यानाः नं खँ मन्यँसा बन्दूक हे ज्वने माःगु जुयाच्वन धइगु सन्देश थ्व निलम्बनं बीत स्वयाच्वंगु खनेदत ।

संसदय् थःपिनि अधिकारया लागिं सः तयाच्वंपिं प्यम्हं सभासद्त थःथःपिनि समुदायया हक स्थापित जुइमाल धइगु माग यानाः सक्रिय जुयाच्वंपिं खः। वय्कःपिनिगु समुदायया सभासद्त सदनय् मेपिं नं दु। तर उपिं थःथःगु पार्टीया ह्वीपय् कैद जुयाच्वंगुलिं उमिसं थःगु अभ्यन्तरया खँ अन तये मफु। खँ तइपिं थ्वहे प्यम्ह सभासद् जुयाच्वन। तःधंगु पार्टीतय्सं थःपिनि खँ मन्यन धकाः संसद दुने संघर्ष यातं नं उमित ककुतिनाः पितिना हयेगु ज्यां वास्तवय् लोकतन्त्रया मूल्य मान्यतायात लज्जित याना बिउगु दु। वय्कःपिंसं तःगु खँ छु खः धकाः संवाद यायेगु तकं धैर्य मदुपिं पार्टीतय्सं वास्तवय् संसद धइगु जनताया खँ तयेगु व न्यनीगु निकाय मखु जुयाच्वन धइगु खँ स्थापित याःगु दु। थ्व स्वयां न्ह्यः वहे सदनय् अर्थमन्त्रीया शुटकेश लाका कायेगु, दायेगु व प्यंकेगु समेत ज्या जुइधुंकल, सुयातं कारवाही मजू। तर थःगु अधिकार फ्वनीपिंत कारवाही यानाः थ्व संसदं थःगु हे ख्वालय् हाकः पाःगु दु ।

More Stories Like this