आदिम विम्बचक्र

नर्मदेश्वर प्रधान

खँयाखँय्
स्वन्ति। मतया नखः। छेँय्छेँय् पाल्चा च्याकी। मतं छायेपी। बजारय् रङ्गीचङ्गी मत खने दइ। झलमल जुइ। स्वन्तिइ मतया धेंधेंबल्लाः जुइ। भुइचम्पा। चक्र। पताका। रकेट। स्वन्तिथुमि पर्व जुइ। वातावरण झःझः धाइ। च्याइ ।

स्वन्तिं छेँनं पिहां वये। नगरपरिक्रमा याये। शहर जाय्क मत च्यानाच्वनी। जाज्वल्यमान। स्वये न्ह्यइपुइ। चाःहिले। न्यूरोड। हुलहुल। स्वन्तिया बजार। लँय्लँय् पसः। पेटी। फुटपाथ। प्यखेरं सामान मिया तइ। हुल। स्वाभाविक। लँयलँय्। बँय्-बँय्पसःत। न्यासि वनेत मछिं। नखःया ई। व्यापारया मेला। व्यापार यायेगु अवसर। बजार गुल्जार जुइ। झिलिमिलि। झिझांमिझां। शून्य वातावरणय् नखःचखःया अनुभूति काये फइ मखु। मनूत म्वःम्वः। हल्लाखल्ला। नखः पर्वया विशेषता जुइ। घ्वातुघ्वानाः। धित्तुधिनाः लँय् वने। न्ह्याइपुयाच्वनी ।

उमेर वनी। नखः प्रतिया अनुभूतिपानावइ। मचाःबलय्। स्वन्ति रहरया खँ जुइ। भुइचम्पा ब्वयेके। रकेट त्वःते। मचाबलय् बिस्कंया अनुभव जुइ। थ्वं आनन्द बी। सन्तोष काये। उमेर जाया वइ। नखःचखःयात स्वयेगु दृष्टि पाइ। दृष्टिइ बौद्धीकरणं लिच्वः लाका हइ। स्वन्तिया विशेषता। भुइचम्पा। रकेट। मल्ता बारा। चक्र। फुक्क खतरा थें ताइ। थुमिसं दुर्घटना हइ। रकेट गनं छेँय् लाइ। मि च्याइ। धनजनया क्षति जुइ। ग्यासें वइ। मस्तय्सं थुइ मखु। क्षणिक सुख। आनन्दया खँ जुइ। तर..छखेर ध्यबा फुइ। मेखेर खतरा उतिकं। उमेर वनी। न्ह्यागु खँय् नं फाइदा बेफाइदाया हिसाब याये वइ। विश्लेषण याये। खः। स्वन्ति नखः न्ह्याइपु। तर पताका, रकेट, भुइचम्पा। थुपिं हानिकारक। स्वन्ति वइ। थुकी सरकारं प्रतिबन्ध तइ। छ्यले दइ मखु। ख्याच्वः बी। तर। बजारय् थुपिं न्याये दइ। मस्तय्सं खुल्लमखुल्ला छ्यली। न्ह्याइपुकी ।

बजार यायेगु उद्देश्य मखु। स्वन्तिया इलय्उखेंथुखें चाःहिले। स्वन्ति न्यायेकेगु पहः। गुकथं हिला वनाच्वन। स्वये। लने। सीके। पीदँन्यय्दँ न्ह्यः। स्वन्ति इलय्। न्यूरोड चाःहिले। थौंया स्वन्तिइ नं न्यूरोड वये। चहलपहल खनी। तर तःधंगु अन्तर वइ। खः। परिवर्तन स्वाभाविक। पने फइ मखु? नुगलय् जिज्ञासा परिवर्तनया कारणं मखु। परिवर्तनं थौं गुगु रुप काइ। गुगु लँ ज्वनी। उकिं थनी। स्वन्तिया इलय् चाःहिहिउँ यानागु अनुभवत लुमनाच्वनी ।

लँय् वँवं उखेंथुखें स्वये। स्वन्तिया हुल। लँय्-बँय् पसः दइ। पसःथुवाःत हालाच्वनी। सामानया विज्ञापन यानाच्वनी। न्याः वा ! आह्वान याइ। थाय्थासय् पसलय् दी। सामानत स्वये। थौंकन्हय्या पसः। पसःतय् बानां तःधंगु मोड कया हयाच्वंगु दु। अनुभव जुइ। सामानत स्वये। न्ह्यपु चाःहिली। छगू पसलय्जिं खने। मियातःगु वस्तुतय् पुचलय् मिसातय् प्यान्टी। नापं। थितुमतु थीक। स्वन्तिबलय् ब्वयेकेगु रकेट। प्यान्टी पसलय् रकेट। बा रकेट पसलय् प्यान्टी। छु जूगु थ्व? अजुचाये ! आकाश। पाताल। छगू हे तँय्। गय् जुल थ्व ! असम्भव ! मती वइ। थ्व पसः मखु जुइ। थुपिं मियातःगु सामान मखु जुइ। शायदथ्व कला प्रदर्शन खःला? प्रतिस्थापन कलाया (इन्सटलेशन आर्ट) ब्वज्या। कलाकार अस्मिना रञ्जित लुमनी। अस्मिनाया प्रतिस्थापन कला प्रदर्शनी जिं स्वयागु दु। शायदप्रतिकात्मक रुपय् अन बँय्प्यान्टी व रकेट तयातःगु जुइमाः। इमि सांकेतिक अर्थ थुइकेत स्वये। अमूर्त कला प्रदर्शनी। स्वयाच्वनागु अनुभूति नं जुइ। पलख दी। प्यान्टी व रकेटया बानाया संयोजन। ब्वसा। तुम्क स्वये। इपिं गबलें महाद्यः पार्वतीया प्रतिक थें ताइ। गबलें गुह्यश्वरी, पशुपतिया मिलन। गबलें इपिं बाइबलया एडम व ईभ थें ताइ। बँ पसलय्प्यान्टी व रकेटया संयोजन। विन्यास। स्व स्वं जिगु सोच, बिचाः, कल्पना सक्रिय जुइत स्वइ। तीव्र गतिं। तर जिं नियन्त्रित याये। छगू उक्ति लुमनी। मनुखं छु खँय् विचाः यायां जब अनियन्त्रितकथं दुहां दुहां वनेत स्वइ। आखिरय् वं थः पिहांवःगु प्वाः खं वनी। जिं थःगु बिचाःयात काबुइ काये। जि अन वने। लँय वँवं मनय् अनेक खँत लुयाच्वनी ।

भिन्चिया बिजुली पसः लुमनी। झिदँ न्ह्यः। स्वन्ति पर्व वइ। भिन्चिया बिजुली पसलय् द्वलंद्वःया सामान वनी। चिम। बिजुलीया सामान। रकेट। भुइचम्पा। रङ्गीचङ्गी मतया माः। द्वलंद्वःया मी। सामान तयां तये लाइ मखु। खुब कमे याइ। थौंकन्हय् अथे मखु। स्वन्ति वइ। बिजुली पसलय् भिन्चा भुजिं ख्यानाच्वनी। स्वन्ति खःला मखुला? छुं पाइ मखु। सामानत छुं चुइ मखु। न्याः वः दइ मखु ।

म्हिगः हरेक पसःया थःथगु बाना दइ। पहिचान दइ। विशेषता दइ। वसः माली। वसः पसः माः वनी। आलु माली। तरकारी पसः स्वइ। वसः न्यायेमाली। कापः पसलय् थ्यनी। मरिचरि माली। मिठाई पसलय् वनी। थौंकन्हय् अथे मखु। पसःपिनें तरकारीया जुयाच्वनी। अन बिजुलीया सामान न्याये फइ। पिने कापः पसः खने दइ। दुने आलु प्याज न्याये दइ। मिठाई पसलय् सिटामोल, कन्डम न्याये दइ। छु पसलय् छु दइ छु मदइ थौंकन्हय् छुं धाये फइ मखु। स्वन्ति वइ। चिम, होल्डर, तार, भुइचम्पा माली। न्हापा थुपिं न्यायेत बिजुली पसलय् वनेमाः। थौकन्हय् अथे मखु। आलु पसः। मरि पसः। वसः पसः। गनं हे नं बिजुली सामान न्यायेफु। भुइचम्पा रकेट कायेफु। थ्व पसलय् थ्व हे जक न्याये दइ धइगु चलन आः मदया वइ। आलु पसलय् मरि। मरि पसलय् वसः। कापः पसलय् जाकि। वस्तु बानाया न्हून्हू कथंया स्वापू, संयोजन जुय बी। प्यान्टी व रकेटया पसः खनी। खँ थुइ। भिन्चाया पसलय् स्वन्तिया इलय् नं बिजुलीया सामान, भुइचम्पा, रकेट छाय् मचुल? कारण थुइ,। म्हिगःया असम्बन्धित वस्तुत। असम्बन्धित बानात। थौकन्हय् छथाय् चूलाइ। काये दइ। न्याये दइ। बानातय् उत्तर आधुनिक मिलन। मिश्रण खने दी। संगति विसंगतिया अन्तर हुया वनी। बँ पसलय् मियातगु प्यान्टी व रकेट। गबले गबलें लुमनी। व विम्बवादी कविता थें ताइ। गन दुने सृष्टि आदिम विम्वचक्र फय्लिंलिचा थें चाःहुलाच्वनी ।

More Stories Like this