इलामय् नेवाः धर्म

इलाम (झीगु स्वनिगः)

नेवाः देय् दबू, इलाम जिल्ला समितिया ग्वसालय् झिंछक्वःगु राष्ट्रिय जनगणना २०६८ विषयक ने.सं. ११३१ तछलाथ्व द्वादशी कुन्हु छन्हुया छगू जनचेतना ज्याझ्वः न्ह्यात । नेवाः देय् दबू इलाम जिल्ला समितिया नायः युद्ध प्रसाद बैद्यया नायःसुइ जिल्ला विकास समिति इलामया सभाकक्षय् निःव्वय् न्ह्यागु उगु ज्याझ्वलय् केन्द्रीय दुजः पूर्णकृष्ण श्रेष्ठ मूपाहाा कथं व्वति कयादीगु खःसा नेपाल आदिवासी जनजाति महासंघ जिल्ला समन्वय् परिषदया छ्याञ्जे राजेश राई, तामाङ्ग घेदुङ्गया नायः छिका तामाङ्ग, नेपाल मगर संघया प्रतिनिधि सरिता मगरया नं व्वति दुगु खः । ज्याझ्वलय् न्हापांगु व्वय् नेवाः देय् दबू इलाम जिल्ला समितिया मूछ्याञ्जे कमल श्रेष्ठं राष्ट्रिय जनगणनाय् आदिवासी व निगुगू व्वय् इलामय् नेवाः देय् दबू धैगु विषयसं ज्यापौ न्ह्यःव्वयादीगु खः ।

नीनिगु गा.वि.स. व इलाम नगरपालिका नापं याना मुक्कं ८० म्हसिया व्वति दुगु उगु ज्याझ्वलय् सकल नेवाःतय्सं थःथःगु मांभाय्स नेवार भाषा च्वकेगु, थःगु जात व जाति नेवार च्वकेगु खाय् व्यापक छलफव व चेतना थनेगु ज्या जूगु खः । थःगु विस्कं भाषा संस्कृति लिपि दुपिं झी नेवाःतय्सं मानेयानाः वयाच्वनागु धर्मया खाय् नं दुग्यंक छलफल जूगु खः । झी नेवाःतय्सं मानेयाना वयाच्वनागु धर्म व नेवाः दर्शन नेपालय् मानेयाना वयाच्वंगु गुगु नं धर्म व दर्शन नापं ज्वःमलाःगु हुनिं जनगणना काःवइगु इलय् नेवाः धर्म धकाः व्यागलं हे धर्म च्वकेमाःगु खाय् सहमत जूगु खः । अथेहे थुगु मुाज्याय् क्वज्यू कथं नेवाः धर्म च्वकेगु खाय् थनया स्थानीय रेडियो व एफ एम पाखें नं प्रचारप्रसार यायेगु ज्या जूगु खः नापं नेवाः देय् दबू केन्द्र पाखें ने पाःया थीथी जिल्लाय् बसोवास याना वयाच्वंपिं नेवाः समुदायपिंत नं नेवाः धर्म च्वकेगु खाय् चेतना थनेया नितिं इनाप याःगु दु ।