राज्य व्यवस्था समितिइ महरा

येँ (झीगु स्वनिगः)

सरकारं देय्या शान्ति सुरक्षाय् सुधार हयेगु नितिं कार्ययोजना न्ह्यब्वःगु दु । व्यवस्थापिका संसदया राज्य व्यवस्था समितिया सोमवाःया बैठकय् उपप्रधान लिसे गृहमन्त्री कृष्णबहादुर महरां विस्तृत कार्ययोजना न्ह्यब्वःगु खः । थीथी राजनीतिक दलया गुलिखय् भातृ संगठन नापं अपराधिक क्रियाकलापय् संलग्न दुगुलिं सुरक्षा अवस्थाय् समस्या वःगु दाबी लिसे कार्ययोजनाय् अपराधिक गतिविधि याइपिंत राजनीतिक संरक्षण बिइमज्यूगु न्ह्यःथनातःगु खः । कार्ययोजनाय् सुरक्षाकर्मीयात साधन श्रोतं सम्पन्न याकेगु, सुया नं थःथितिपिंत बांलाःगु थासय् लाकेगु परम्पराया अन्त्य यासें निश्चित मापदण्डया आधारय् सरुवा बढुवा यायेगु लगायत दु । सुरक्षा क्षेत्रय् सुधार यायेगु नितिं सुरक्षा ऐनय् हिउपाः हयेगु लगायतया विषयलय् गृहकार्य यायेत शसस्त्र प्रहरीया पुर्व डिआइजि गोपालमान श्रेष्ठया संयोजकत्वय् कार्यदल दयेकूगु गृहमन्त्री महरां जानकारी बियादिल । देशय् अझ नं सुरक्षा हाथ्या कायम दुगुलिं हाथ्या सामना यायेगु नितिं दलीय सहमतिया आवश्यकता कुलादीगु दु । महरां दलतदथुइ जूगु सहमतिकथं न्हूगु संविधानया एकीकृत मस्यौदा निर्माण व शान्ति प्रक्रिया लिच्वलय् थ्यंकेमफुसा भदौ १४ जःखःया दिसं सुरक्षा हाथ्या अझ अप्वइगु ग्याःचिकु दुगु धयादिल ।