उछुङ्खल सभासदतय्त पितिंन

ई व आवश्यकतायात थुइके मफुपिं गवलें नं नेता जुइमखु, समूहगत लँपुंलि ब्यागलं च्वनाः याकः बुकः जुइगु व च्वनेगु नं राजनीति जुइमखु । वर्तमान राजनीतिया विषयवस्तु छु ? समस्या छु ? थुकियात त्वःतेगु खःसा उज्वःपिं सभासद् व राजनीतिक दलया अस्तित्व ल्यनी मखु । संविधानसभाया म्याद थपय् यायेमाःगु इलय् समस्या थनेगु, ६०१ सभासद्तय्गु दथ्वी प्यंगू दलया प्यंम्ह सभासद्पिसं राष्ट्रिय मुद्दायात ध्याक्वय् तयाः अर्थ निवर्थया नारा लगय् यानाः विना अहम भूमिकाया आधारय् हिरो जुइत स्वइपिं भेलेन तक्क जुइगु नं हैसियत मदु व दैनं मखु । थौं वहे प्यंगु दलया प्यम्ह सभासद्तय्त संविधान सभाया नायः सुवास नेवाङ्गं मार्सल लगय् यानाः संविधानसभाया भवनं पितिना छ्वल, छवाःया नितिं सभासद् पदंनं निलम्वन यात । थुमिगु माग न्ह्याक्को हे रचनात्मक व सही जूसां संविधान निर्माणया दथ्वी शान्ति प्रकृया पूवंकेगु लँपुइ न्ह्याः वनाच्वंगु पलाःयात अवरोध यायेगु ज्या सुनांनं यायेमज्यू । विना राजनीतिक पृष्ठभूमिया चांचां गठन जूगु पार्टी वा दल व उकिया सभासद्तय्सं ईया गति व देशया न्ह्यःने वयाच्वंगु मू विषयवस्तुयात नजर अन्दाज यायेमज्यू । सुनां थुकियात ध्यान वियाः न्ह्याः वनेफैमखु, व सभासद् वा दल फाल्टो जोकर सावित जुइ ।

उकीसनं विस्तारवादी भारतं संविधानसभा भंग याकाः राजनीतिक दलया सभासदतय्त खसि, दुगुचा न्यायेथें ६०/६० लाखं न्यानाः सकृयता क्यनाच्वंगु इलय् दलित जनजाति पार्टीया विश्वेन्द्र पासवान संघीय लोकतान्त्रिक राष्ट्रिय मञ्चया रुकमणि चौधरी व स्वतन्त्र सभासद् सरदल मिया हक पिन्त भारतया गुप्तचर संस्था "र" या एजेन्टनाप तक्वः तःथाय् उथवश जूगुयात ध्यानय् तयेवलय् थुमिगु नारा जुलुसया खास उदेश्य छु खः धयागु सीकेत व थुइकेत थाकूगु खँ मखु । ल्यं दनिगु नेपाः राष्ट्रिय पार्टी व उया सभासद् नाप "र" नाप स्वापू, खँल्हावल्हा दु मदु एकीनसाथ धायेथाय् मदु । तर विदेशीतय्गु ध्यबाय् उथबस याइपिं सभासद्पिंन्त पासा वियाः नेपाः पार्टीया सभासद् वुद्ध साय्मिं सही यातकि गलत थ्व धाःसा नेपाःमितय्सं मूल्यांकन याइगु खँ खः । संविधानसभाया स्वदँया इतिहासय् थ्व दकले न्हापां थुगुकथं सभासद्पिन्त संविधानसभाया भवनं पितिना छ्वःगु खः । संसद नियमावली २०६५ या नियम ४६ कथं वयकःपिं प्यम्हय्सित पितिना छ्वःगु खः । थःपिनिगु अधिकारया नितिं सः तयेगु बांमलाःगु खँ मखु । तर अधिकारया ग्यारेन्तिया माग न्ह्यःने तयाः संसद दुने ताः इलंनिसें नारा जुलुसय् लिकुनाच्वंपिसं वंगु संविधानसभाया म्याद फुनाः संविधानसभाहे भंग जुइत्यंगु इलय् थ्व प्यंगु दलया प्यम्ह सभासद् पिसं छु याना ? संविधानसभाया म्याद तनेत छु गुगु ज्या यात ? थुकिया नितिं छु मयायेगु अले थःपिनिगु अधिकार सुनिश्चित यायेमाल धायेगुया अर्थला इमान्दारिता खनेमन्त । अधिकारयात सुनिश्चित याकेगु पासवान लगायत सभासद्पिनिगु कुतः मात्रै कुतः मजुसे विदेशीतय्गु ध्यबाय् थःपिन्त मियाः संविधान सभा दुनेया नारा व विरोध मात्रै नाटक खः, प्याखं खः । थुज्वःपिन्त संविधानसभां पितिनाः छ्वाःया नितिं सभासद्ं निलम्वन याःगुयात लसकुस हे यायेमाः । सभामुख नेवाङ्गया थुगु पलाःयात उचित व ई कथं ल्वःगु मधासे मगाः ।

More Stories Like this