एसएलसीइ ५५ दशमल ५ प्रतिशत पास, आंशिकपाखे १७ दशलब ३ प्रतिशत पास
न्हापासिबें ८ दशमलब ८१ प्रतिशत म्हो पास
येँ (झीगु स्वनिगः)
विद्यार्थीतय्गु नितिं नँयागु ध्वाखा कथं नालातःगु एसएलसीया थुगुसीया नतिजा म्हिगः सार्वजनिक याःगु दु । परिक्षा नियन्त्रण कार्यालय सानोथिमिपाखें म्हिगः सनिलय् सार्वजनिक याःगु लिच्वः कथं थुगुसी नियमितपाखे ५५ दशमलब ५ प्रतिशत विद्यार्थीत अले आंशिकपाखे १७ दशमलब ३ प्रतिशत पास जूगु दु । न्हापाया दँया तुलनाय् थुगुसी ८ दशमलब ८१ प्रतिशत कम पास जूगु दु । थगुसीया लिच्वः कथं नियमितपाखे मुक्कं यानाः २ लाख ३० हजार ४ सय १९ म्ह पास जूगु दु । परिक्षा नियन्त्रण कार्यालयपाखें सार्वजनिक याःगु नतिजा कथं थुगुसी विशिष्ट श्रेणिइ ३० हजार १ सय ११ म्ह अथे हे न्हापांगु श्रेणिइ ८२ हजार ६ सय १९ , द्वितीय श्रेणिइ १ लाख ९ हजार ७ सय ९५ उगु हे कथं तृतिय श्रेणिइ ८ हजार २ सय ४१ म्ह पास जूगु दु । अथे हे आंशिकपाखे ९ हजार ९ सय ३३ म्ह पास जूगु दु । इपिं मध्ये १ सय ३८ म्ह न्हापांगु श्रेणिइ, ७२ हजार ६६ म्ह द्वितिय श्रेणिइ अले २ हजार १ सय ८७ म्ह तृतिय श्रेणीइ पास जूगु दु ।
थुगुसी देय्न्यंकं यानाः ४ लाख ९६ हजार२ सय ४३ म्ह विद्यार्थीतय्सं एसएलसी जाँच ब्यूगु खःसा उकिइ मध्ये नियमितपाखे मिजंपिं २ लाख २९ हजार ७ सय ९१ अले मिसापिं २ लाख ६ हजार ६ सय २० म्हेस्यां जाँच ब्यूगु खः ।
