लाजिम्पाटय् गोलीं कयेकल

येँ (झीगु स्वनिगः)

येँया लाजिम्पाटया छगू म्यानपावरया ज्याकुथिइ म्हिगः सोमवाः न्हिनय् गोली चलेजूगु दु । मोटरसाइकलय् वःपिं म्हमस्यूपिं निम्ह मनूतय्सं अनया शिखर म्यान पावरया रिसेप्सनय् वयाः निगू राउण्ड फाइरिङ यानाः बिस्युं वंगु खः । फाइरिङपाखें छुं नं क्षति धाःसा जूगु मदु । पालेयात म्यानेजर गन दु धकाः न्यनाः रिसेप्सनय् इपिं वःगु खःसा म्यानेजर मदु धकाः जानकारी बिइवं इमिसं फाइरिङ याःगु खः । ५३१५ नम्बरया हाकूगु मोटरसाइकलय् वःपिं इमिसं फाइरिङ याःगु खः । उगु म्यानपावर कम्पनीया संचालक फहिम शाह खः । म्हमस्यूपिं निम्हेस्यां अथे फाइरिङ यानाः बिस्युं वंगु धैगु उगु म्यानपावर कम्पनीया म्यानेजरयाके चन्दा काः वःगु नापं इमिसं ख्यानाः वंगु खयेमाः धकाः अनुमान याःगु दु । उगु घटना जूगु खबर वयेवं घटनास्थलय् उपत्यका अपराध अनुसन्धान कार्यालयपाखें डिएसपी सोमेन्द्रसिंह राठौरया नेतृत्वय् प्रहरीया छगू पुचः हे उखेपाखे वंगु खः । उगु घटनायात कयाः प्रहरीं अनुसन्धान यानाच्वंगु दु ।