शासकीय स्वरुप फ्रेन्च मोडलया प्रस्ताव

प्रत्यक्ष चुनावं राष्ट्रपति,संसदं प्रधानमन्त्री

येँ (झीगु स्वनिगः)

न्हूगु नेपाःया न्हूगु संविधानय् शासकीय स्वरुप फ्रेन्च मोडलया रुपय् दुथ्याकेत संविधानसभाया संवैधानिक समिति अन्तर्गत उपसमितिं दयेकूगु कार्यदलं प्रस्ताव याइगु जूगु दु । न्हूगु संविधानय् प्रत्यक्ष निर्वाचित राष्ट्रपति व संसदपाखें निर्वाचित प्रधानमन्त्री जुइगु मिश्रति मोडलया शासकीय स्वरुप कःघाये फइगु विकल्प कार्यदलं न्ह्यःने न्ह्याकूगु दु । राष्ट्रपति व प्रधानमन्त्रीदथुइ अधिकार बँडफाड यानाः मिश्रति प्रणालीया शासकीय स्वरुप कःघाये फइगु विकल्प कार्यदलं न्ह्यःने न्ह्याकूगु खः । थ्व स्वयाः न्ह्यः नं बहसया रुपय् न्ह्यःने वःगु मिश्रति प्रणाली प|न्स लगायतया देशय् प्रचलनय् दु । मिश्रीत मोडलया शासकीय स्वरुप छ्यलेबलय् कार्यकारी राष्ट्रपति व प्रधानमन्त्रीया दथुइ अधिकार इना काइगु जुगुलिं अधिकार प्रयोगया विषयलय विवाद नापं वयेफूगु अन्तर्राष्ट्रिय अनुभव दु । कार्यदलं माओवादी व काग्रेस निगुलिं कयाः वयाच्वंगु अडानयात कयाः न्ववायेगु कथं दथुइया मोडल न्ह्यःने न्ह्याकूगु खः । संविधान निमार्णया सर्बाधिक विवादीत विषय राज्यया शासकीय स्वरुप गज्याःगु जुइ धइगु विषयलय् दलतदथुइ विवाद अझ नं दनि ।

एकिकृत नेकपा -माओवादीं) प्रत्यक्ष निर्वाचित राष्ट्रपति नेपाली कांग्रेसं संसदपाखें निर्वाचित कार्यकारी प्रधानमन्त्री व एमालें प्रत्यक्ष निर्वाचीत प्रधानमन्त्रीय प्रणाली छ्यलेमाःगु अडान कया वयाच्वंगु दु । सभासद् लक्ष्मणलाल कर्ण संयोजक दुगु न्याम्ह दुजः दुगु कार्यदलं संविधानया थीथी पीच्यागू विवादीत विषयलय् न्ह्यन्हु बिका सहलह याःगु खः । राज्यया शासकीय स्वरुप सम्बन्धी विकल्प लिसेया विषय कःघानातःगु प्रतिवेदन कार्यदलं विवाद समाधान उपसमितिइ न्ह्यब्वइ । उगु कार्यदलं राज्य पुनर्संरचना समितिया ७८ विवादित विषययात २६ बुँदाय् हःगु दु । उगु कार्यदलय् एकीकृत माओवादीपाखें खिमलाल देवकोटा, नेपाली कांग्रेसपाखें राधेश्याम अधिकारी, एमालेपाखें अग्नी खरेल व सपना प्रधान मल्ल च्वनादीगु खः । संयोजक जुयादीम्ह कर्ण मधेसी लोकतान्त्रिक मोर्चापाखें प्रतिनिधित्व यानादीगु खः । वंगु मंगलवाः संवैधानिक समितिया उपसमितिं गठन याःगु उगु कार्यदलया दुजःपिन्त वय्कःपिन्त छवाःया दुने हे सहमतिया नितिं ज्या यायेगु अले उपसमितिया लःल्हायेगु धकाः भाला ब्यूगु खः । वय्कःपिं न्याम्हं हे संविधानसभाया संवैधानिक समितिया दुजः नाप नापं संविधान विद्त खः । न्हूगु संविधानया विवादित विषय ज्यंकेगु नितिं धकाः दयेकूगु संविधानसभाया संवैधानिक समिति अन्तर्गत उपसमितिया मुँज्या गबले च्वनीगु धकाः धाःसा स्पष्ट जूगु मदुनि । अले उगु उपसमितिं हाकनं कार्यदलया म्याद थप याइगु बाय् मेगु हे कथं सहमति ब्वलंकीगु खः व धाःसा सी मदुनि ।