निलम्बित सभासद्त आन्दोलनय्
येँ (सन्ध्या टाइम्स)/राज्यं बहिष्करण लाकातःपिं समुदायया हक अधिकार सुनिश्चित यायेया निंतिं संसदय् संघर्ष यायेगु झ्वलय् न्हय्न्हु निलम्बित जूपिं प्यम्ह सभासद् नापं वय्कःपिनि राजनीतिक पार्टीं आः सतक संघर्ष याइगु जूगु दु ।
निलम्बित सभासद्पिं नेपाः राष्ट्रिय पार्टीया बुद्ध साय्मि, दलित जनजाति पार्टीया विश्वेन्द्र पासवान, संघीय लोकतान्त्रिक राष्ट्रिय मञ्चया रुक्मणी चौधरी व स्वतन्त्र सदरुल मियाँ हकपिनि थौं च्वंगु मंकाः मुँज्यां थःपिंसं ल्ह्वना वयाच्वनागु माग पूरा याकेत आः सतक संघर्ष यायेगु सहमति जूगु दु ।
थौं हे सभासद्त दुथ्याःगु स्वंगू राजनीतिक दलया ब्यागलं ब्यागलं बैठक च्वनेधुंकाः संघर्षया ज्याझ्वः तयार यायेगु खँ नेपाः राष्ट्रिय पार्टीया सभासद् बुद्ध साय्मिं कनादिल।
वय्कःपिं प्यम्ह सांसदतय्सं राज्यया फुक्क निकायय् राज्यं बहिष्करणय् लाकातःपिं फुक्क समुदायया समानुपातिक प्रतिनिधित्वया ब्यवस्था यायेत माःकथंया समावेशी विधयेक हयेमाःगु माग यासें आन्दोलन याना वयाच्वंगु खः ।
सरकारं समावेशी विधयेक धकाः कर्मचारीया कुतलय् हःगु थःपिंसं स्वीकार याये फइ मखु धासें उगु विधयेक तयार यायेगु नितिं राज्यं बहिष्करणय् लाकातःपिं समुदायया प्रतिनिधित्व याकाः आयोग दयेकेमाःगु वय्कःपिनि माग खः ।
नेपाः पार्टीया भर्त्सना:
थ्वहे झ्वलय् नेपाः राष्ट्रिय पार्टीया अध्यक्ष डा. केशवमान शाक्यं थःगु पार्टीया सभासद् लगायत न्यायया लागिं ल्वानाच्वंपिं प्यम्ह सभासद्यात षडयन्त्रपूर्ण ढंगं निलम्बन यानाः लोकतन्त्रया अपमान याःगु बिचाः प्वंकादीगु दु। वय्कलं उगु निलम्बनया भर्त्सना यासें तुरुन्त निलम्बन फुकुवा यायेत नं माग यानादीगु दु। थ्व मामिलय् वःगु प्रमया प्रतिवद्धता शव्दजाल जक खः धासें वय्कलं आः थुकिया विरोधय् आन्दोलन यायेगु बाहेक मेगु विकल्प मदुगु खँ नं कनादीगु दु ।
