फ्रेञ्च मोडलया शासकीय प्रणालीइ सहमत
राष्ट्रपति जनतां ल्यइ, प्रधानमन्त्री संसदं ल्यइ
येँ( सन्ध्या टाइम्स)/न्हूगु संविधानय् शासकीय स्वरुप गज्याःगु जुइ धकाः वयाच्वंगु छगू विवाद समाधान जुइगु संकेत वःगु दु। संविधान च्वज्याय् वयाच्वंगु विवाद ज्यंकेत दयेकातःगु उपसमिति अन्तर्गतया कार्यदलं आः फ्रेञ्च मोडलया शासकीय प्रणालीइ वनेगु सहमति कायम याःगु खः। लक्ष्मणलाल कर्णया अध्यक्षताय् स्वनातःगु उगु कार्यदलया थौं च्वंगु बैठकं शासकीय स्वरुप फ्रेञ्च मोडेलयात स्वीकार यायेमाली धकाः प्रस्ताव तयेगु निर्णय याःगु खः ।
शासकीय प्रणाली गज्याःगु जुइ माली धइगु खँय् विवाद जुयाच्वंगु इलय् फ्रेञ्च मोडेलय् वने माली धकाः एमालेया वार्ताकारतय्सं प्रस्ताव याःगु खः। अथे खःसां स्वय्म एमाले दुने धाःसा फ्रेञ्च मोडेलयात कयाः विवाद जुयाच्वंगु दु। थ्व स्वयां न्ह्यः एमालें इजरायली मोडलया प्रस्ताव हयाच्वंगु खः ।
फ्रेञ्च मोडलय् राष्ट्रपति जनतापाखें तप्यंक निर्वाचित याइ। अले संसदपाखें प्रधानमन्त्री निर्वाचित याइ। राज्यया कार्यकारी अधिकार राष्ट्रपति व प्रधानमन्त्रीयात बराबर दइ। संसदय् छु पार्टीया बहुमत दु वहे पार्टीं सरकार गठन याइ। गबलें गबलें राष्ट्रपति छगू पार्टीयाम्ह व प्रधानमन्त्री मेगु पार्टीयाम्ह जुल कि अज्याःगु अवस्थाय् नं गतिरोध पिदनीगु याइ ।
थ्व सहमतिया नापनापं संविधान च्वज्याय् वयाच्वंगु विवादास्पद बुँदाया ल्याः २५ य् कुहां वःगु दु ।
