चांचां १५४ म्ह डिएसपी सरुवा
येँ (सन्ध्या टाइम्स)/प्रहरी प्रधान कार्यालय मातहतया १५४ सिबें अप्वः डिएसपीतय्त वंगु चान्हय् सरुवा याःगु दु। सरुवापाखें देय्न्यंकंया ४५ जिल्ला व ८० सिबें अप्वः प्रहरी कार्यालयया इन्चार्जत हिलेगु ज्या जूगु दु। लिपांगु इलय् वयाः छुं दिं न्ह्यः जक काजय् वंपिं स्वनिगः नापं फुक्क थासय् न्हूपिं डिएसपीतय्त जिम्मेवारी बिउगु दु ।
प्रहरी महानिरीक्षक रवीन्द्रप्रताप शाह, गृह सचिव लीलामणि पौडेल व गृहमन्त्री कृष्णबहादुर महरां शनिवाः सनिलय् हे डीएसपी सरुवाया अन्तिम निर्णय याःगु खः। खेस्रा यानाः क्वःछिउ कथं उगु धलखय् कम्प्यूटर टाइप यानाः सार्वजनिक याये न्ह्यः हे दबाबया कारणं धलःया नां झिकः तक हिलेगु ज्या जूगु खँ स्रोतं धाःगु दु ।
थ्यंमथ्यं छगू दर्जन थाय्या निंतिं थीथी प्रभावशाली निकायपाखें दबाब वःगु कारणं सरुवाया निर्णय थ्यंमथ्यं २४ घण्टा लिपा जक सार्वजनिक याःगु खः ।
