संसदन्ह्याकेगु वार्ता विफल
राष्ट्रपतिया प्रस्ताव हःसा थौं हे न्ह्याइ
येँ (सन्ध्या टाइम्स) राष्ट्रपतिया बारे सदनय् बहस यायेत राजनीतिक पार्टीत तयार जुल धाःसा थौं हे संसद सुचारु जुइगु खँ प्रधानमन्त्री व माओवादी अध्यक्ष पुष्पकमल दाहाल 'प्रचण्डं' धयादीगु दु । थौं सुथय् नेपाल एफएमयात विशेष अन्तर्वार्ता बिसें वय्कलं उगु खँ धयादीगु खः ।
एफएमलिसे खँ ल्हायेगु झ्वलय् वय्कलं राष्ट्रपितं ल्ह्वंगु पलाः राजनीतिक प्रकृतियागु जूगुलिं उकिया बारे संसदय् बहस याये जिउगु दावी नं यानादिल । 'राष्ट्रपतिया पलाः राजनीतिक प्रकृतियागु खः उकिं सदनय् बहस याये जिउ ।' वय्कलं धयादिल ।
राष्ट्रपति विवादया बारे सहमति जुल धाःसा सरकार गठन यायेगु ज्या नं सहमितं जुइ धासें वय्कलं उकिया नितिं राजनीतिक दलतलिसे थौं खँल्हाबल्हा यायेगु जानकारी नं बियादिल ।
थ्वहे झ्वलय् सरकार गठन व माओवादीं सदन अवरुद्ध यानाच्वंगु बारे माओवादी व एमालेया नेतातय् दथुइ थौं सुथय् जूगु वार्ता असफल जूगु दु । सदन सुचारु यायेगु नितिं जूगु उगु वार्ताय् माओवादीं राष्ट्रपतिया पलाः सच्चे यायेगु बारे संकल्प प्रस्ताव हयेमाः धइगु अडान मत्वःतेवं वार्ता असफल जूगु खः ।
माओवादी व एमालेया वरिष्ठ नेतातय् दथुइ माओवादी संसदीय ज्याकू सिंहदरवारय् जूगु उगु खँल्हाबल्हाया झ्वलय् माओवादीं राष्ट्रपति विरुद्ध संकल्प प्रस्ताव दर्ता यायेगु नितिं ग्वाहालि यायेत इनाप याःगु खःसा लिसलय् एमालेया नेतातय्सं संकल्प प्रस्ताव मखुसें सार्वजनिक महत्वया प्रस्ताव दर्ता यायेत माओवादीयात सल्लाह बिउगु खः ।
निगू पुचःया खँ मिले मजुइवं वार्ता छुं हे निष्कर्ष पिमकासें भंग जूगु खः ।
उखे थौं सुथय् माओवादीया वरिष्ठ नेता मोहन बैद्य किरण व एमालेया वरिष्ठ नेता माधवकुमार नेपाल दथुइ नं सहलह जूगु दु । वय्कःपिनि दथुइ जूगु खँल्हाबल्हाया विवरण धाःसा पिहां मवःनि ।
माओवादीं सदन अवरुद्ध याना च्वंगुलिं सरकार गठन प्रकि्रया न्ह्याये मफयाच्वंगु इलय् जूगु थ्व नापलायेगु ज्या समस्या समाधान यायेगु नितिं खः धकाः नं एमालें धाःगु दु ।
उखे सदन सुचारु यायेया नितिं सभामुख सुभाष नेम्वाङ्गं थौं थीथी राजनीकि पार्टीया नेतातलिसे सहलह याइगु ज्याझ्वः दु । सदन न्ह्याकेत वय्कः नं सक्रिय जुयाच्वनादीगु दु ।
थौं च्वनीगु सदनया बैठक नं माओवादी अवरोधया कारणं सुचारु मजुल धाःसा प्रधानमन्त्रीया निर्वाचन सम्बन्धी कार्यविधि सुचं तिकाः जूसां सार्वजनिक यायेगु तयारी नं संसद सचिवालयं यानाच्वंगु दु ।
थ्वहे झ्वलय् सरकारय् थःपिं सहभागी जू वनेगु वा मवनेगु धइगु बारे सहलह यायेगु नितिं मधेशी जनअधिकार फोरमया केन्द्रीय समितिया बैठक थौं च्वंगु दु । थनया होटल ग्राय्ण्डय् उगु बैठक च्वंगु खः । फोरम अध्यक्ष उपेन्द्र यादव सरकारय् मवनेगु पक्षय् दुसा वरिष्ठ नेता विजय गच्छेदार सरकारय् वनेमाः धइगु पक्षय् दु ।
