संघर्षया निंतिं नेवाः जातीय खलः पुचःतय् मुँज्या
नेवाः स्वायत्त राज्य मंकाः संघर्ष समितिया ग्वसालय् 'नेवाः स्वायत्त राज्य: जातीय खलःतय् सरोकार' विषयय् मंकाः मुँज्या जुल। ज्याझ्वलय् स्वीगू जातीय खलः पुचःतय्सं ब्वति काःगु खः ।
ज्याझ्वलय् सभानायः लिसें संघर्ष समितिया नं नायः गजेन्द्र मानन्धरं नेवाः स्वायत्त राज्य जातीय खलःया सरोकार बारे अवधारणा पौ न्ह्यब्वयादीगु खः। उकी संविधानसभा दुने व पिने जुयाच्वंगु संघीयता, गणतन्त्र, धर्मनिरपेक्षता जातीय म्हसीका नापं स्वशासनया विरोधघय् जुयाच्वंगु षड्यन्त्रयात इलय् हे वाःचायेकेमाःगु, इलय् ज्या याये मफुसा संविधान पिहां मवइगु, संविधानसभापाखें मखुसें आयोगपाखे सविधान पिकाइगु सम्भावना दुगु खँय् सचेत यासें माल धाःसा सडक आन्दालनय् वयेत नं खलःपुचःतय्त आह्वान यानातःगु दु ।
मुँज्याय् कपाली समाज, बलामि समाज, खड्गी समाज, बज्राचार्य समन्वय परिषद, माली समाज, केन्द्रीय मानन्धर संघ, ज्यापु महागुथि, पुं समाज लगायत नीगू खलः पुचलं थःथःगु जातीय समाजया बिचाः तःगु खः। समितिपाखें समितिप्रति समाजया धारणा, समितिया ज्याझ्वलय् गुकथं ब्वति कयाच्वनागु, आन्दोलन प्रभावकारी यायेगु निंतिं समितिं यायेमाःगु भूमिका व समितिनाप स्वापू क्वातुकेमाःगु खँय् सहलह याःगु खः ।
ज्याझ्वःया लिपांगु ब्वय् संघर्ष समितिया सचिवालय संयोजक मल्ल के. सुन्दरं आःया संक्रमण काल व संविधान दयेकेगु अन्तिम इलय् नेवाःत गम्भिर जुइमाःगु खँ न्ह्यथँसें स्वायत्त राज्य मवल धाःसा नेवाःत तना वनीगु खँ न्ह्यथँसें संकट वःगु वाःचाःबलय् हे समाधान यायेगु बुद्धिमानी जुइ धयादिल ।
मुँज्यां पारित याःगु प्यंगू बुँदाय् जातीय खलः पुचःपाखें वःगु लिच्वः कथं ब्यापक रुपं संघीयता व स्वायत्त राज्यया विषयय् दक्व खलः पुचः व जातीय समुदाय दुने ध्वाथुइकेगु, सरकारयात थःपिं जागरुक जुयाच्वनागु दु धइगु संकेत बीगु, माल धाःसा न्ह्यागु थासय् व न्ह्यागु इलय् नं न्ह्यचिलेत तयार जुइफुगु युवा दस्ता तयार यायेगु व संविधान च्वज्याया अन्तिम इलय् दवाव बीत शक्ति प्रदर्शन तक नं यायेमाःगु निर्णय याःगु खः ।
नेवाः राष्ट्रिय म्येँ हालाः न्ह्याकूगु उगु ज्याझ्वलय् ज्यापु महागुथिया महासचिव राजभाई जकःमिं लसकुस यानादीगु खःसा एकीकृत नेवाः राष्ट्रिय मुक्ति मोर्चाया नायः दिल बहादुर श्रेष्ठं सुभाय् बियादीगु खः ।
