पत्रकार, नेता व पुलिसया गोल चक्कर

सानुराजा शाक्य

पत्रकारत थौंकन्हय् आन्दोलनय् दु। संविधानसभां संविधान च्वयेगु ज्या जुयाच्वंगु इलय् थःपिनि अधिकार संविधानय् च्वकेत दवाव बीगु निंतिं नेपाःया नेवाः लगायत आदिवासी जनजाति, दलित मधेसीत थःथःगु कथं आन्दोलन निरन्तर यानाच्वंगु दु। थ्व हे आन्दोलनय् थपू जुइत नेपाःया पत्रकारत आन्दोलनय् वःगु धाःसा मखु। उमिगु माग संविधानसभानाप मखु राज्यया प्रशासन यन्त्रं शान्ति सुरक्षा बी मफुगु खँय् खः। विराटनगरया छम्ह पत्रकारयात युवा संघया कार्यकर्तातसें ल्हाः वानाः बाम्हसिक्क घाःपाः याना बिउगुलिं उमित कारवाही जुइमाल धकाः पत्रकारत आन्दोलनय् वःगु खः। थ्व घटनानाप स्वानाच्वंपिं पत्रकारत एमाले पार्टीनाप हे सतीपिं खःसा उखे युवा संघ नं एमालेया हे संगठन खः। मेखे सरकारया नेतृत्व नं एमालें हे यानाच्वंगु दुसा मात्र गृहमन्त्री छम्ह जक एमाओवादी पार्टीयाम्ह खः। पत्रकारयात ल्हाः वाःपिं युवासंघया छम्ह निम्ह कार्यकर्तायात ज्वनातःगु नं दु तर पत्रकारतय् माग थ्व घटनाया प्रमुख डिजाइनर युवासंघ मोरङया नायः पर्शुराम बस्नेतयात नं ज्वनेमाल धइगु खः। पर्शुराम बस्नेतयात पुलिसं ज्वने मफूगुलिं फरार धायेगु यानाच्वंगु दुसा युवासंघया नायः महेश बस्नेतं सार्वजनिक रुपं पर्शुराम जिमिगु सम्पर्कय् दु पुलिसं फुसा ज्वँ धकाः च्यालेन्ज यायेवं पत्रकारत पर्शुरामयात सुचुका तयेगु ज्याय् एमालेया नेतातय् ल्हाः दु, शक्तिया आडय् पत्रकारतसें लिखित उजुरी बियातःम्हेसित नं मज्वं धकाः द्वपं बियाच्वंगु दु। थ्व घटनाय् न्ह्यइपुगु पक्ष धइगु ल्हाः नःम्ह पत्रकार नं एमालेयाम्ह व आन्दोलित पत्रकार महासंघया नेतृत्व नं एमालेयापिं खः। थ्व घम्साघम्सी एमालेया पत्रकारत व एमालेया युवासंघ दथुइ हे वैमनस्यता ब्वलनाः आरोप प्रत्यारोप यानाच्वंगु छखे नाटक थें नं खने दया वइगु ।

आरोपित पर्शुराम बस्नेतयात पुलिस प्रशासनय् वनेत एमाले पार्टीं निर्देशन बिउसां युवासंघया हे नायः महेश बस्नेतं आरोप पुष्टि मजूतले पर्शुराम बस्नेतयात लःल्हाये मखु धकाः च्यालेन्ज बियाच्वंगुलिं म्हिगः म्हिगः एमाओवादी लगायत राजनीतिक दलनाप सम्बन्धित धयातःपिं नेता कार्यकर्तात अपराधय् आरोपित जुयाः पुलिसपाखें बिसिउँ वनाच्वंपिंत ज्वँ धकाः धायेगु नैतिक धरातल फ्यासुइ। थुकिं आपराधिक मनोवृत्तिया मनूतय्त राजनीतिक संरक्षण बीत अःपुइ। छम्ह अपराधय् आरोपित व्यक्तियात बचे यायेत गुकथं संगठनयात हे छ्यलेगु प्रवृत्ति संगठनया साख न्ह्नावनी। राजनीतिक प्रतिशोधया कारणं थुकथंया आरोपत वःगु खःसा वनाप ल्वायेबलय् जनसमर्थन दइगु खः तर अपराधनाप तप्यंक स्वानाच्वंगु घटनाय् राजनीतिक संरक्षण बिउगु खने दइबलय् वइगु घाटा युवासंघया निंतिं जक मखु समग्र एमाले पार्टीयात हे लिच्वः लाइगु महसूस यानाः हे जुइ पार्टी पर्शुरामयात पुलिसय् हाजिर जू वनेत धाःगु खइ। तर पार्टीया निर्देशनया विरुद्ध युवासंघया अमूक नेतातसें यानाच्वंगु कृयाकलापं छुं युवातय् हौसला ला अप्वइ तर पार्टी व राजनीतिक नेतृत्वं भविष्यय् पुले मालीगु मूल्य धाःसा घातक जुइ ।

युवा संघनाप हे स्वानाः यूथ फोर्सया नां नं वयेगु याः। विवादय् दुपिं महेश बस्नेत व पर्शुराम बस्नेत निम्हं यूथ फोर्सया पूर्व केन्द्रीय नायः व मोरङया नायः खः। यूथ फोर्सया गतिविधि अनियन्त्रित जुयाः मखुगु लँय् लाइगु सम्भावना खनेवं पार्टीं यूथ फोर्सयात मदयेका छ्वःगु खः। तर यूथ फोर्सया नामं अपराधयात संरक्षण जुइगु ज्या गनं गनं जुयाच्वंगु घटनाया रुपय् नं विराटनगरया पत्रकारयात दाःगु घटनायात कायेगु याः। छगू इलय् एमाले दुने यूथ फोर्स दयेकाः ठीक याना उकिं पार्टी न्हूपिं युवातय्त संगठित यायेत लँपु चाल व एमाओवादीया वाइसिएलया एकछत्र राजयात चुनौती बीत आवश्यक संगठन हे खः धकाः च्वंगु खः। तर लिपा यूथ फोर्सया नामय् ठेक्का पट्टा, जग्गा दलाली, निर्माणय् कमिशन, मुद्दा मामिला मिले यानाः ध्यबा नयेगु आदि कानून ल्हातय् कायेगु ज्यात खने दयेवं यूथ फोर्स बदनाम जुइगु खने दया वल। उकिं पार्टीं थुज्वःगु संगठनयात न्ह्यःने मयंकेगु धाःसां पूर्व यूथ फोर्सया छुं मनूतय् उज्वःगु क्रियाकलाप मदिउगु द्वपं जुइकथं विराटनगरया पत्रकारयात दाःगु घटना पिने पिदन। थ्व घटनाय् नं राजनीतिक स्वयां नं थीथी अपराध व गुण्डागर्दी ज्या जुयाच्वंगु, निगू यूथ फोर्सया नायःपाखें हे संगठित अपराध जुयाच्वंगु खँ एमालेया हे पत्रकारं च्वयाबिसेंलिं यूथ फोर्सय् दुपिं धाःपिं युवातसें उम्ह पत्रकारयात ल्हाः तयाः ज्यान कायेगु नियत तःगु तकं खनेदत। धायेत ला एमालेया छुं शीर्ष नेतातसें थुकियात अय्लाः त्वनाः जूगु ल्वापु धकाः नवःगु खि त्वपुइत स्वःसां घटनाया पृष्ठभूमि व प्रवृत्ति धाःसा राजनीतिक खोलय् ग्यानापुगु अपराधीतय्त संरक्षण जुइ फइगु सम्भावना उला बिउगु खनेदत। म्हिगः एमाओवादीया वाइसिएल दुने नं थुकथंया अपराधयात संरक्षण बिया तल धकाः बीगु द्वपं थौं एमालें नं फये मालाच्वंगु दु ।

थ्व घटनानाप मेगु छगू पक्ष नं स्वायेत स्वयाच्वंगु दु व खः थौंकन्हय्या गृहमन्त्री एमाओवादी। पत्रकारतसें गृहमन्त्रीं नं आरोपित मनूयात ज्वनेगु कुतः मयाः धकाः द्वपं बीगु यानाच्वंगु दु। छगू इलय् गृहमन्त्री एमाओवादीयात बी हे मजिउ धकाः एमाले दुने घम्साघम्सी जूगु सकसिनं सिउगु हे खँ खः। एमाओवादीयात गृहमन्त्री बिल धाःसा 'वाइसिएल अगाडि बढ्, पुलिस प्रशासन पछाडि हट' धकाः माओवादीं राज्य कब्जा याइ धकाः एमालेया हे छुं शीर्ष नेता धाःपिंसं सार्वजनिक रुपं आरोप बिउगु खः। तर थौं थ्याक्क अवस्था अःखः जुयाच्वंगु एमालेया यूथ फोर्स न्ह्यःने एमाओवादीया गृहमन्त्री लिउनेया अवस्था जुयाच्वन। यदि पत्रकारयात ल्हाः वाःपिं यूथ फोर्सया कार्यकर्ता मजुसे वाइसिएलयापिं जूगु खःसा एमाले दुने गृहमन्त्री एमाओवादीयात बियाः नल मखुला ल्वाप्पा धकाः प्रधानमन्त्री झलनाथ खनालया ख्वाः ह्याउँक क्वाःक्वाः त्याइगु जुइ। उकिं थुकिं नं क्यं अपराधयात प्रश्रय जुइगु कथं संगठन परिचालन जुल धाःसा माउ पार्टीयात हे घाघः जुइयः धकाः एमाले व एमाओवादीं शिक्षा कायेमाः ।

More Stories Like this