अन्ततः बजेट हयेत सहमति जुल

थुपालय् इलय् हे बजेट वइगु जूगु दु। नेपाःया अर्थतन्त्रयात वास्तवय् द्यवं हे बचे यानातःगु धायेमाली। बजेट थेंज्याःगु नियमित रुपं महसें मगाःगु आर्थिक ज्याखँ तकं गोलमाल जुयाच्वनं नं अर्थतन्त्र आः तक 'क्राय्श' जूगु मदुनि। आः नकतिनि स्वंगू राजनीतिक दलया नेतातय् दथुइ नियमित बजेट इलय् हे हयेगु धकाः सहमति जूगु बुखँ पिहां वःगु दु। व नं स्वय्म राष्ट्रपतिं हे 'हस्तक्षेप' यानाः स्वंगुलिं दलया नेतायात 'निर्देशन' बीवं तिनि बजेट हयेगु सहमति जूगु खः ।

राजनीतिक अवस्था न्ह्याथे हे उथलपुथल जुयाच्वंसां बजेट थेंज्याःगु आर्थिक गतिविधि छुं नं कथं प्रभावित जुइ मजिउ। इलय् बजेट मवःगु कारणं यानाः राज्यं दुकायेमाःगु गुलिखे राजश्व छखे लाइगु ला द हे दु, उकिया नापनापं देय्या औद्योगिक व्यापारिक ख्यः नं प्रभावित जुयाच्वंगु दइ। गुलिखे उद्योगयात प्रोत्साहन स्वरुप न्हूगु नीति लागू यायेमाःगु जुयाच्वनी, गुलिखे उत्पादनया कर पुनर्विचार यायेमाःगु जुयाच्वनी, गुलिखे उत्पादनया सवालय् विदेशीलिसे न्हूगु कथं संवाद यायेमाःगु जुयाच्वनी। तर इलय् बजेट मवयेसातकि अज्याःगु छुं हे जुइ मखुत। अले उद्योग वाणिज्य नं स्वतः हे प्रभावित जू वनीगु जुल ।

राजनीतिक थथ्याःक्वथ्याःया थःगु हे गति दयाच्वनी। उकिं अर्थतन्त्रयात लिच्वः लाके मजिउ। उकिसनं थौंया विश्व राजनीतिं स्वयां नं अर्थनीतिं न्ह्यःने न्ह्यानाच्वंगु दइ। अर्थतन्त्र 'क्राय्श' जुल धाःसा उकियात दयेकेत तसकं थाकुइ। उकिं राजनीतिक पार्टीतय्सं आः राजनीतिक गतिरोध कायम हे जुयाच्वंसां नं अर्थतन्त्रया लँ धाःसा मपनेगु सहमति दयेकेमाःगु नितान्त आवश्यकता दु ।

More Stories Like this