निक्वःगु कार्यकालया नितिं नं मुनयात सिफारिस

अमेरिका (एएफपी)

राष्ट्रसंघीय मू छ्याञ्जे वान कि मुनयात झिंन्याम्ह दुजः दुगु सुरक्षा परिषद्ं निक्वःगु कार्यकालया नितिं सिफारिस याःगु दु । मंगलबाः जुइगु सच्छि व गुइनिम्ह दुजः दुगु देय्या राष्ट्रसंघ महासभा बैठकं वय्कःयात पुनर्निर्वाचित यायेगु निश्चित थें हे जूगु दु । न्यादाया कार्यकाल दइगु मू छ्याञ्जेया नितिं मेमेपिं प्रतिस्पर्धी लुयाः वःगु मदुनि । परिषद बैठकं मतदान बिना हे वय्कःयात सिफारिस यायेगु निर्णय याःगु खः ।
राष्ट्रसंघ क्षेत्रीय समूहत मध्येया छगू ल्याटिन अमेरिका व क्यारिबियनं वानयात स्वीकार यायेत सहमत मजुइवं बैठक छन्हु लिहांवंगु खः । प्राविधिक रुपय् क्षेत्रीय समूहया सहमति म्वाःगुलिं परिषद्ं निर्णय याःगु खः । ख्वीन्ह्यदाया वान दक्षिण कोरियाया पूर्वअर्थमन्त्री नापं जुयादीगु खः । वानं अंगः छ्यलेफइगु सुरक्षा परिषद दुजःत अमेरिका, बेलायत, पान्स, रुस व चीनया समर्थन कायेफूगु मदुनि ।

सिफारिस निर्णयया इलय् ब्राजिलया ब्रासिलियाय् दुम्ह वानं थःगु वक्तव्यय् मू छ्याञ्जेया रुपय् थ्व तःधंगु संगठनया सेवा यायेदइगु महान ह्वःताः दुगु धासें विश्वास व समर्थनया नितिं आभार प्वंकूगु दु । अझ नं थाकूगु हाथ्या प्रति सचेत दुगु नं वय्कःया धापू खः । राष्ट्रसंघया अलिखित नियमकथं मू छ्याञ्जे थीथी क्षेत्रीय समूहया देय्तपाखें पालंपाः जुइमाः । सुरक्षा परिषद्या स्थायी दुजःया नागरिक जुइमज्यू । तर जलवायु परिवर्तन, आणविक निःशस्त्रीकरण व मिसाया मुद्दाय् वय्कःया प्रतिबद्धतां लोकंह्वाःगु सफलता प्राप्त याःगु दु । वानदथुइ अंग्रेजी भाषाया पूर्ण ज्ञान मदुगु द्वपं नापं लानाच्वंगु दु ।

More Stories Like this