चीधंगु ल्वाभः - तःधंगु समस्या

येँ (झीगु स्वनिगः)

एकीकृत नेकपा माओवादीया सभासद् कल्पना धमलां - द्वन्द्वकालय् नं आपालं मिसापिं विधवा व मचात अनाथ जुल, गुलिखय् मिसापिनिगु हत्या जुल धयादीगु दु । वय्कलं धयादी - थौं नं अपराधीपिनिगुपाखें मिसात बलात्कृत, हिंसाया शिकार जुयाच्वंगु दु । उकिं चीधंगु ल्वाभःया अवैध व्यापार पनेमाः । ल्वाभः प्रशारणयात नियन्त्रण यायेमाः । शान्ति व विकासया नितिं मिसा रक्षा, नेपाः व रुपन नेपाःया मंकाः ग्वसालय् जूगु उगु सहलह ज्याझ्वःया सभापतित्व मय्जु शोभा श्रेष्ठं यानादीगु खः । उगु ज्याझ्वलय् ज्यापौ न्ह्यःब्वसें परराष्ट्रविद् हिरण्यलाल श्रेष्ठं दक्षिण पाखेया खुला सीमाना यानाः अवैध ल्वाभः नेपालय् दुहां वयाच्वंगु दु । नेपालय् चीधंगु ल्वाभलं यानाः मिसा व मचात अप्वः पीडित जुयाच्वंगु दु । उकिं सीमा नियन्त्रण यायेमाः । ल्वाभःया अवैध व्यापार पनेमाः । बन्दुके संस्कारया थासय् शान्ति व मानव अधिकार संस्कृति वयेमाः वय्कलं धयादिल । ज्याझ्वलय् सरिता महर्जन, सिता महत, नगिना लगायत व्यक्तिपिंसं नं न्ववानादीगु खः ।