शान्ति व संविधानया नितिं मालधाःसा विद्रोह यायेगु : डा. भट्टराई
येँ (झीगु स्वनिगः)
एकीकृत नेकपा माओवादीया न्वकु डा. बाबुराम भट्टराईं शान्ति व संविधानया नितिं मालधाःसा माओवादीं विद्रोह याइगु धयादिल । ईन्जिनियरिङ्ग अध्ययन संस्थान पश्चिमाञ्चल क्याम्पस पोखरा लामाचौरय् आइतवाः याःगु विद्यार्थी लिसे कर्मचारी सम्मान ज्याझ्वलय् न्ववानादिसें नेता भट्टराईं शान्ति व संविधानया नितिं एमाले, कांगे्रस लगायतया दलत गम्भीर मजूगुलिं मालधाःसा माओवादी विद्रोहलय् वनेगु धयादीगु खः । माओवादीं सेना समायोजनया खाका व मोडालिटी तयार यायेधुंकूगु न्ह्यःथंसें वय्कलं कांगे्रस व एमाले सरकारय् च्वनाः थीथी शर्त तयाः गैर जिम्मेवार जूगु बिचाः तयादिल ।
वंगु जेठ १४ गते संविधानसभाया ई तनेधुंक स्ववाःया अवधिइ सरकार दयेकेगु व क्वःथलेगु कासा बाहेक छु नं न्ह्यःथने बहःगु प्रगति जुइमफुगु धयादिसें भट्टराईं शान्ति व संविधानया नितिं वइगु भदौ १४ गतेदुने राष्ट्रिय सहमति कायम यानाः न्हूगु संविधानया ड्राˆट तयारलिसे सेना समायोजनया प्रारम्भिक ज्या न्ह्याकेमाःगुलिइ बहः बियादिल । ज्याझ्वलय् न्ववानादिसें वय्कलं देय् विकासया नितिं विद्यार्थीपिनिगु दवाब व आन्दोलन माःगु दाबी यानादिसें आर्थिक विकासया नितिं प्राविधिक शिक्षाय् बहः नापं बियादिल ।
