नेवाःत मदुगु नेवाः राज्य

के. एम. जे

ब्वनेकुथिइ ब्वनीपिं मस्त देशया कर्णधार धाइगु धापूला झी दकस्यां न्यंहे जुइ । तर थौं वया छु जुल धाःसा नेवाः राज्य घोषणा जूगु न्हापांगु दँय् जुयाच्वंगु झिंछक्वःगु जनगणनाय् ब्वत्ति कायेत जेठया लिपांगु वाः निसेहे ब्वनेकू दिका हे झिंदँय् छकः वइगु जनगणनाय् ब्वति काःवया च्वंगु दु । आ थथे याना शिक्षकत वइवलय् ब्वनामि मस्तय्गु भविष्य ख्यूउंसे मच्वनीला ? आ ये याम्ह शिक्षामन्त्री नेवाः हे जुसां नेवाः खलः पुचःया शिक्षित वेरोजगारीतय्त छाय् थुकय् दुमथ्याकल मन्त्री परिषदं हे छाय् शिक्षकत तयेगु निर्णय यात ? येँ देया नेवाः गां गामय् दक्व गैर नेवाः शिक्षक जुइवलय् नेवाःतय्गु ल्याः गनं अप्व दँ ? आः सक्व थें जागु नेवाः गामय् हे अनयापिं वेरोजगारी ल्यासे ल्याय्म्हतय्त ज्या मविसे मन्त्री परिषदया निर्णय कथं जिल्ला शिक्षां कथं थथे कार्यान्वयन यात । थथे याःसा नेवाः न्ह्लुवाःत सुम्क, जिल्ला शिक्षा अफिसय् नेवाः अफिसरपि मदुगुलिनं थथे गैरनेवाःतय्सं थथे नेवाः राज्य दुने लापरवाही याःगु दु । अय्नं नेवाः राज्य समितिया न्ह्यलुवाः नेतातय्सं नेवाःतय्गु लागि छु हे च्यूता तःगु खनेमदु । यदि नेवाः राज्य दुने थथे हे गैर नेवाःतय्सं शासन याइगु खःला ?

थन नेवाःत अफिसर दुगु अफिसय् हे नेवाः ज्याकःमितय्त हे अपमान याइ । गैर नेवाःयात अप्वः तलव वियाः नेवाः ज्यकःमितय्त कम ध्यवा वियाच्वंगु दु । थथे जुसां छम्ह नेवाः नं मेम्ह नेवाःयात थःकायेगु ज्या मयात । थथे नेवाः राज्य दुने नेवाःतय्गु ल्याः म्हो जुइका गथे यानाः नेवाः राज्य जुइ ? छगूला थः नेवाः जुया नेवाः धायेके मयःपि नेवाःतय्सं यानाः नं थुगुसिया जनगणनाया नेवाःतय्गु ल्याः म्हो जुइगु सम्भावना दु । नेवाः देय् दवुया ल्याः कथं बाह्र लाख चानचुन नेवाःत दु । थौं कन्हय् नेवाः भाय् मल्हाइपिं व ल्हाय् हे मखु धाइपि नेवाःतय्सं यानाः नं नेवाःतय्गु ल्याः २०५८ सः स्वया २०६०या दशकय् म्हो जुइ । थ्व छगु नेवाःतय्त हे नेवाःतय्सं अपमान याःगु खनेदु । यदि नेवाः न्ह्यावलें खँय् वम्हुतय्गु न्ह्यःने प्याख ल्हुया च्वनेगु खःसा नेवाः खलः पुचः धका छाय् स्वनेमाल । यदि जनताया नाम भोट कयाः लिपा वहे जनतायात म्हमसिल धइपि नेतात थें नेवाः नेतात न जुइगु खः व कुर्सिया लागि जक छाय् राजनीति यायेगु ?

झीगु अधिकारया लागि ल्वायेगु खःसां दकलय् न्हापा जि नेवाः खः झी फुक्क नेवाः खः धइगु भावना थुइके माल । दकलय् न्हापा २०२१ साल भूमिसुधार वः वलय् न खँय् ब्रम्हुतय्सं झंगः ल्हानाः बच्छि जग्गा थःपिनिगु नामय् तयाः तिनि नेवाःतय्गु जग्गा पास याना विल । आःयागु जनगणनाय् नं थुकेया लिच्व वइ । छम्ह खँय् शिक्षक गणकं न्ह्यसः न्यनीवलय् व मनुखं खँय् भाषंहे लिसः विलकि व गणकला थः पाखे यंकेत स्वइ । अथे जुगूलिं झीसं नेवाः भाषंहे लिसः विइमाः, नेवाःतय् गुलिन जात जातित दु इपिं दक्व छपुहे खिपःथें जात अलग अलग जूसां नेवाः हे खः धकाः छप्पं छधी जुयाः वनेफःसा तिनि नेवाः राज्य दुने झीगु अधिकार कायेफइ । नेवाःतय्गु ल्याः कायेत खँय् व्रम्हु वयाः नं इमिसं नेवाःतय्गु ल्याः अप्वः क्यनीला ? थुकेला नेवाः दे दबू याकेनं बिस्कं हे नेवाःतय्गु ल्याः कायेमाला थुकेयानाः कन्हय् सरकारं काइगु नेवाःतय्गु ल्याः व झीगु ल्याखय् गुलि पाः स्वये दै । थथेला जिल्ला जनगणना कार्यालय "ख"लय् च्वंम्ह छम्ह अधिकृतया धापू नं थथे हे दु । कन्हय् देय् दबू नं कयातःगु ल्याः व सरकारं काःगु ल्याःखय् पाःगु खने दतकि सरकारया नाप ल्वायेगु लँपु दै धकाः न धाःगु दु । नेवाःतय्गु ल्याः म्हो जुइगु हुनि छगूला नेवाः मिस्त खँय् ब्रम्हु नाप वनकि खः । अज्याःपिसं थःगु भाय् व जात ला सुहे सुचुकी नापं व पाखे दुपिं मस्त फुक्क खँय् व्रम्हु हे जु वनी । तर वहे मनू थःगु हे जात नाप वगु खःसा ला व पाखे दुपिं मस्त दक्व नेवाः हे जुइगु खः । अले नेवाःतय्गु ल्याः नं अप्वः जुइगु खः ।

थौं कन्हय् मनुतय्सं नेवाः स्वयाःनं नेवाः भाय् मल्हाइगु व नेवाः धायेके मयःया दुनि दु । विदेशय् जूसा पिने वंपि मनूतय्त दकलय् न्हापा थःगु देया भाय् ल्हाकेत स्वइ यदि थःपिनिगु भाय् थुइके मफुत धायेगु निति राष्ट्र भाषा छ्यली । थन अथे मखु सयमा मसयमा खँय् भाय् नि ल्हायेगु स्वइ । थथे याना नेवाःतय्गु ल्याः १२ व १६ गथे यानाः दयेके फइ ?

More Stories Like this