अपराधीकरणय् एमाले

अमीररत्न ताम्रकार

विराटनगरया पत्रकार व सञ्चारकःमि खिलानाथ ढकालयात बांमलाक्क दायाः अस्पतालय् लानाच्वंगु इलय् आरोपित व्यक्ति मध्ये मुख्य योजनाकार परशुराम वस्नेतयात प्रहरीं थौंतक्क ज्वनाः कानुनी कारवाही न्ह्याके फूगु मदु । थुकियाहे विरोधय् सलंसः पत्रकारतय्सं कलम, क्यामेरा, डायरी, रेकर्डर सहित न्हिन्हिथं प्रदर्शन धर्ना विरोध ज्याझ्वः न्ह्याका वयाच्वंगु दु । एमालेया भातृसंगठन युथफोर्सया मोरङ्ग जिल्लाया नायः परशुराम ढकालयावारे जानकारी दुसां प्रहरीं ज्वनेफूगु मदु । थ्व खँय् आक्रोषित पत्रकारतय्सं न्हिन्हिथं विरोध धर्ना ज्याझ्वः यानावःगुयात अनुचित धायेफै मखु । आन्दोलन अप्वयेकाः यंकेगु वाहेक मेगु विकल्प मदु । आरोपित व्यक्ति वस्नेतयात युथ फोर्सया नायः महेश वस्नेतं थःगु सम्पर्कय् दुगु व परशुरामं छुंहे अपराध मयाःगु व अपराध याःगुहे खःसा नं अपमान यायेत अःखतं प्रहरीयातहे हाथ्या व्यूगु दु । उलिजक मखु, प्रहरीं परशुरामयात फुसा ज्वनाः क्यनेत महेश वस्नेतं प्रहरी प्रशासन व राज्य सत्तायात हे हाथ्या व्यूगु दु । थ्व खँ कानूनी राज्य व्यवस्थाया नितिं दकले गम्भीर व मछाले पुस्से च्वंगु खँ खः ।

एमाले थःयात कम्युनिष्ट पार्टी धाःसां वा धयावःसां सर्वहारावर्गया हकहित त्वःताः वुर्जुवा वर्गया हकहितया नितिं दनाः कांग्रेसया भाई जूवनसा, शसस्त्र संघर्ष त्वःता संसदीय दलदलय् कुहांवनाः संशोधनवादया लँपुइ ब्वांवन । थःयात कम्युनिष्ट धायेत मत्वःतूसां एमालेया ध्वांय् छपु वाहेक कम्युनिष्टया नामय् छुंहे ल्यंमदयेधुंकूगु दु । एमालेया ज्याकू वल्खु दरवारय् छगू इलय् खायातःगु माक्र्स, एंगेल्स, लेनिन व माओया फोटो नं अमेरिकी राजदूतया वल्खु दरवारया परिक्रमाया झ्वलय् लिकाःगु थौं तक्क नं खिउँगु भण्डारय् कोथाय् वांछ्वया तःगु दु । कम्युनिष्टया लँपु त्वःताः कांग्रेसया भाइ जुइगु फरमुला पिकाःम्ह मदन भण्डारीयात नं जीवराज आषिर्त लिसें मृत्युया मुलय् थ्यनावीधुंकूगु दु । अमेरिकी साम्राज्यवाद, विस्तारवादी भारत व एमालेया नेतातय्गु ल्हाः दुगु भण्डारीया हत्या थौं तक्क नं हत्यारा पत्ता लगय् यायेत एमाले उत्सुक खनेमदु । वारम्वार सत्ताय् च्वनाः नं मदन भण्डारीया हत्यारा मालेज्याय् एमालेया अनिच्छुक क्यनाच्वंगु धयागु हत्यारात एमाले दुनेहे दुगु खँयात संकेत याइ ।

विदेशीतय्गु ब्वहलय् ब्वह दिकाः पलखय् पलाः मिलय् यानाः एमालें न्ह्याकूगु हत्याया श्रृंखला दथ्वी थौं तक्कया दुने डर्जनौं मनूत सीधुंकूगु दु । सलंसः मजदुर, किसान, विद्यार्थी, व्यापारी व पत्रकारत हिंसात्मक आक्रमणया शिकार जुइधुंकल । खिलानाथ ढुंगाना वहे श्रृंखलाया लिपांगु कडी खः । तर थ्व ज्या धाःसा निरन्तर रुपं न्ह्यानां च्वनीगु खँ अवस्था दु । कम्युनिष्ट पार्टी दुने वाइसिएलया गठन सिद्धान्तत आवश्यक जक मखु अनिवार्य खः । ल्यायम्हतय्त राजनीतिकरुपं परिचालन यायेगु व प्रतिकृयावादीतय्गु षडयन्त्रयात चुंचुं यायेत वाइसिएल संगठन आवश्यक जुइ । रुसय् लेनिनं नं वाइसिएल मार्फत क्रान्तियात माःगु ग्वाहालि काःगु खँ इतिहासं क्यं । वाइसिएल थुगुकथं कम्युनिष्ट पार्टी व सिद्धान्तनाप क्वातुक्क स्वानाच्वंगु दु । थुकिया विपरित एमालेया भातृसंगठन युथफोर्स वा युवा संगठनं छुंनं सिद्धान्त नाप आवद्ध मदु । सिद्धान्त विहिन संगठनत विशेष यानाः युथफोर्स गुलित अनुशासनहिन अराजक जुयाः पिहां वल उकिया अनुमान खुद एमालेया नेतातय्सं तकं याःगु मदुनि । मदन भण्डारीया हत्या लिपा युथफोर्सयाहे मनूतय्सं एमालेया न्वकु वामदेव गौतमयात तकं हत्याया धम्की व्यूगु खँ सुनां लोमंकुगु खइमखु ।

एमालेया युथफोर्सया गठन यायेगु ग्वसाः पितव्यूम्ह नं मेपिं मखु, खुद माओवादीं बिसुं वंम्ह व पूर्व स्थानिय विकास मन्त्री रविन्द्र श्रेष्ठ खः । माओवादी दुनेया वाइसिएलया संगठानिक संरचनायात न्ह्यःने वयाः अले राजनीतियात गुण्डागर्दीइ हिलेत एमालेय् युथफोर्स गठनयाःगु खः । सिद्धान्त माओवादीया भातृसंगठन वाइसिएलया प्रतिकार यायेगु नियतं युथफोर्सया गठन जूगु खः । तर युथफोर्सयात छु सिद्धान्त व छु गुगु मूल्य मान्यताया दुने तयेगु धयागुया छु लिसः छु आधारहे मदु । सिद्धान्त विहिन जुलकि हिंसक शक्ति वा समूह अन्तत अपराधिक समुहलय् रुपान्तरण जुइ । थुकिं बचय् यायेगु मेगु छुं लँहे मदु ।
थुकिया उदाहरण माल धाःसा मेमेगु मधेसय् डर्जनौं शसस्त्र समूहया ल्यूने विस्तारवादी भारतया ल्हाः दुथें मधेसवादी राजनीतिक दलत नं मुक्त मदु । मधेसीवादी दलतय्सं नं अन गतिशील गुलिखय् शसस्त्र समुहतनाप सहलह यानाः व माली वलय् इमिगु ग्वाहालि कायेगु व वीगु यानावयाच्वंगु दु । मधेसय् हत्या हिंसा, अपहरण, ध्यबा वसुली, लगायत ज्याय् मधेसवादी दल व अनया शसस्त्र समूहत छगूहे स्तरय् दु । इमिगु दथ्वी क्वातूगु स्वापू दु ।

युथफोर्सया कार्यकर्तातय्गु दथ्वी टेण्डरयात कयाः ल्वापु जूगु व लाखौंया ध्यवाया खँय् छम्हय्स्यां मेम्ह्यसित स्यायेगु ग्वसाः ग्वःगु खँ खिलानाथ ढकालं सीकेवं समाचार दयेका पितविल । थ्वहे खँयात कयाः ढकालयात सांघातिक आक्रमण जूगु खः । वनं विसुं वनेफूगुलिं जक वचय् जूगु धाइ । मखुसा ढकालयात दाजक दायाः स्यायेगु परशुरामपिनिगु योजना खः । युथफोर्सया नायः महेश वस्नेत एमालेया विवादास्पष्ट नेता केपी शर्मा ओलीया जब ल्हाः खः । वाइसिएलया प्रतिरोधया नामय् दयेकूगु युथफोर्स राजनीतिकरुपं सिद्धान्त हिन जुइवं उगु समूहपाखें सकारात्मक ज्याला छुंहे मजू, जुइमफु, आःखतं हिंसा, हत्या, अपहरण आतंक हप्ता वसुली लगायत ज्या यानाः अपराधिक समूहलय् हिलावनाच्वंगु खँय् खुद एमालेयाहे नेतात चिन्तित दु । थुकिया लिपांगु हर्कटं थ्व खँयात अज्ज स्पष्ट याइ । आरोपित वा अपराधिक व्यक्तिया संरक्षण वियाः महेश वस्नेतं सारा प्रहरी प्रशासनयात हे हात्था विल । अपराधी परशुराम वस्नेतयात प्रहरीयात लः मल्हायेगु फुसा प्रहरीं ज्वनाः क्यनेत सारा प्रहरी प्रशासनयात जक मखु खुद सरकारयात हाथ्या विइगु हरकत यात । देशय् दण्डहिनताया अवस्था सृजना यानाः सरकारया सुरक्षा व्यवस्था असफल जूगु खँयात थन व्यवहारिकरुपं प्रमाणित यायेत स्वयाच्वंगु स्पष्ट दु ।

देशय् राजनीतिकरुपं तरलताया संवेदनशील अवस्थाय् लानाच्वंगु इलय् युथफोर्सया थुगुकथंया अपराधिक आतंकपूर्ण गतिविधिं पत्रकार जगत जक मखु खुद एमालेया नेतात नं सुरक्षित मदु । केपी ओली, माधव नेपाल थें प्रतिगामी व्यक्तितय्गु विरुद्ध सः थ्वयेकेगु ज्यानं जुयावयेधुंकूगु दु । पूर्व अर्थमन्त्रि सुरेन्द्र पाण्डेया ओली विरुद्धया द्वपंपौ थुकिया दसु खः । थुकिया विरुद्ध जन आक्रोस नं मदु । दवय् यायेगु नितिं एमालेयाहे संस्थापनपक्षत नं थौं युथफोर्स पाखें सुरक्षित मदु । थ्व खँ एमालेया नेतातय्सं इलय्हे वाःमचायेकल धाःसा पत्रकार ढकालया अवस्था भोगय् यायेमाली मखु धकाः धायेफैमखु । अपराधीयात ज्वनेगु सरकारया दायित्व खः । दायित्व पूवंकेगुली सरकार ताःमलागुहे खनेदु । महेश वस्नेतनाप जक मखु, एमालेनाप नं परशुरामयात प्रहरीयात लःल्हायेगु सहमत जूसां पालना जूगु मदु । अःखतं अपराधीयाहे ज्वनेमज्यूगु, अपराध मयाःगु व न्यायालयं दोषी खः धकाः प्रमाणसहित प्रमाणित यात धाःसा जक लःल्हाये धायेगु ला अपराधीयात अपराध यायेदयेमाः धकाः धायेथें खः । युथफोर्सया नायः महेश वस्नेतया राज्यप्रतिया थुगु हाथ्या यथार्थय् एमालेयात आः संशोधनवादं अपराधिकरणय् रुपान्तरित याकेगु वाहेक मेगु छु जुइख्वाः मवः ।

More Stories Like this