सेनाय् नं चलखेल ?

भारतीय विस्तारवादं अतिकं चलखेल व हस्तक्षेप जुयावयाच्वंगु नेपाःया राजनीतिक ख्यलं नेपाली सेनाय् नं दुतयंकेगु कुतः जुयाच्वंगु दु । भारतीय मोडलं न्ह्यानाच्वंगु नेपाली सेनाय् आः वयाः साम्राज्यवादी अमेरिकाया निर्देशनय् प्रधान सेनापति छत्रमानसिंह गुरुङ्ग अमेरिकी मोडलया सेना संगठनया संरचनाय् रुपान्तरित यायेगु प्रस्ताव रक्षा मन्त्रालयय् न्ह्यब्वःगु दु । अमेरिकी सेना संरचनाया मोडलकथं हालया संख्या स्वयाः अव्येकेगु व संगठन यात नं व्यापकरुपं विस्तार यायेगु खँ न्ह्यथना तःगु दु । थुगु सांगठनिक संरचनाय् दुहां वनेवं म्होनिं छगू डर्जनौं मयाक जरनलत थपय् यायेगु जरुरी जुइ । सहायक रथि निसें रथि तक्कया दुने छगू डर्जनं अप्वः जनरलत थपय् यानाः न्ह्यावनीगु जुइ । प्यम्ह रथि थपय् यानाः प्यंगू न्हूगु विभाग चायेकेगु खँ दु । थुकी अप्रेशन व इन्टेलिजेन्स ट्रनिङ्ग व डक्टि्रन, वन्दोवस्ती व सेवा अले संगठन व कल्याणकारी विभाग जुइ ।

हालैनिति नेपाल अमेरिकी सेना तयाः नेपाली सेनायात ट्रेनिङ्ग आदि वीगु प्रस्ताव वःगु लगत्तै प्रधानसेनापति गुरुङ्गया थुगु प्रस्तावया दथ्वी छुं मखु छुं स्वापू दुगु खँ अनुमान यायेत थाकु मजू । थुकिं नेपालय् सेनाया संख्या आः स्वयाः नं अप्वयेके मालीगुला दहे दु नाप नापं अमेरिकां थप सैनिक ग्वाहालि वीगु नं मदैमखु । तर थुकिं देशयात छु विइ ? मू न्ह्यसः थ्व खः । हाल नेपाली सेनाय् दुगु ९५,७०० संख्यायात क्वपालेमाःगु व सेनाय् जुयाच्वंगु अत्याधिक खर्च नं म्हो यानाः उत्पादनमूखी आर्थिक क्षेत्रय् लगानी यायेमाःगु खँ पिहांवया च्वंगु इलय् अमेरिकी मोडलया सैन्य संरचनां नेपालय् अमेरिकी सेना दुहां वयेत स्वयाच्वंगु व अमेरिकी मोडल थुकियाहे छगू अगंकथं नं न्ह्यःनेहःगु खँय् नं विचाः यायेफयेमाः । अथ्यला थुगु मोडलयात कयाः थौंकन्हय् तिनि खँ पिहांवःगु खःसा नं खँ तसकं न्हूगु नं मखु । विद्यादेवी भण्डारी रक्षा मन्त्री जुयाच्वंवलय् नं प्रधानसेनापति गुरुङ्गं खँ याकेगु ज्या जूगु खः । तर अवले प्रधानसेनापति सम्वन्धीहे समस्या वयेवं हे सैन्य संरचना सम्वन्धि खँ ध्याक्वय् लावन व सेनापति सुयात यायेगु धयागु खँय्हे अप्वः ई काल । धायेगु हे खःसा नं तत्कालिन रक्षा मन्त्री भण्डारीं प्रधानसेनापति गुरुङ्गयात आःया नितिं थ्व खँ जरुरी मदु धकाः धया हःगु खः ।

अमेरिकी मोडलया सेना संरचना जुइवं अमेरिकी सेना नेपालय् दुहांवयेत अःपुइ । छगूमखु छगू त्वह तयाः अमेरिकाया सेनात नेपालय् दुहां वइ । माओवादीया जनसेना सेनासमायोजन जुयाः ७०००-१०००० दुहांवल धाःसा उकिं छुंनंकथं प्रभावित मयायकेत नं सेनाया मोडलय् हिउपाः हयेत्यंगु जुइफु । सेनाया संख्या अप्वयेकेगु छु नं कथंया ज्या जुइमज्यू । द्वन्द्वया इलय् अर्थात २०५८ सालय् ५०,०००या संख्या दुगुली २०६३ सालय् थ्यनेवं ९५,७०० सेना दयेकूगु खः । तर थुकिया प्रयोजन छु व गन दु ? धयागु न्ह्यःसया लिसः निं नेपाली सेनां वीमाः ।

More Stories Like this