पत्रकारतय्गु न्हूगु चरणया संघर्ष

येँ (झीगु स्वनिगः)

पत्रकार खिलानाथ ढकालयात आक्रमण याःम्ह मू दोषीयात ज्वनाः आः तक नं सरकारं कारवाही मयाःगुलिं पत्रकार महासंघ मोरङ शाखां संघर्षया ज्याझ्वः सार्वजनिक याःगु दु । संघर्षया ज्याझ्वः नाप नापं पत्रकारतय्सं मुलुकय् सरकार दुगु अनुभुति याये मखन धासें सांकेतिक कथं सरकार दुगु मदुगु अध्ययण यायेत शिवबहादुर कार्कीया संयोजकत्वय् मोहन भण्डारी व विक्रम लुइँटेल दुजः दुगु समिति गठन याःगु दु । उगु समितिपाखें निन्हुया दुने हे प्रतिवेदन सार्वजनिक याइ धाःगु खः । अथे हे आन्दोलनया थप ज्याझ्वः कथं पत्रकारतय्सं दोषीयात कारवाही यायेमाःगु माग यानाः फेसबुक अभियान संचालन यायेगु, सोमवाः सिठ्ठी जुलुस पिकायेगु व प्रधानमन्त्री, गृहमन्त्री व संचारमन्त्रीयात छगू हे शैली व्योहोराया एसएमएस छ्वयेगु धकाः तकं निर्णय याःगु दु । अथे हे असार ७ गते सुथय् ८ बजेनिसें बहनी ६ बजे तक लगातार स्वन्हु जिल्ला प्रशासन ज्याकुथिइ रिले अनसन च्वनेगु, असार १० गते बृहत्त विरोध र्‍याली पिकायेगु ज्याझ्वः सार्वजनिक याःगु दु । पत्रकारयात आक्रमण याःगु घटनाया योजनाकार एमालेया युवा संघया मोरङ जिल्लाया नायः परशुराम बस्नेतयात सरकारं आः तक नं ज्वनाः कारवाही मयाःनिगुलिं पत्रकारतय्सं निरन्तर रुपं आन्दोलन यानाः वयाच्वंगु खः ।