सेना समायोजनया खँय् माओवादी-कांग्रेसया थःथःगु अडान

येँ (झीगु स्वनिगः)

म्हिगः आइतवाः स्वंगू दलया शीर्ष नेतातय्गु दथुइ प्रधानमन्त्री निवास वालुवाटारय् जूगु मंकाः मुँज्याय् एकीकृत माओवादी व नेपाली कांग्रेसं सेना समायोजनया सवालय् थःथःगु अडान तयेगु ज्या जूगु दु ।

एकीकृत माओवादीं लडाकूत समूहगत रुपय् हे समायोजन यायेमाः धकाः अडान तसें ८ निसें १० हजार लडाकुत समायोजन यायेमाः धकाः धाःगु खः । उगु मुँज्याय् नेपाली कांग्रेसं सेना समायोजन समूहगत रुपय् यायेफै मखु धकाः अडान तःगु खः । कांग्रेसं सेनाया मापदण्डया आधार अर्थात सेनाय् न्हूपिं सेना भर्ना कायेगु इलय् थें हे यानाः लडाकुतय्त समायोजन यायेगु धकाः अडान तयाः वयाच्वंगु खः । एकीकृत माओवादी व कांग्रेसं सेना समायोजनया सवालय् मोडलया बारे न्हापांनिसें हे थःपिन्सं तयाः वयाच्वंगु अडानयात यथावत याःगुलिं सेना समायोजनया विषयसं ठोस खँ क्वःछिइ मफूगु खः । सेना समायोजन नापं मेमेगु सवालय् थःथःगु पार्टी दुने सहलह ब्याकेगु नापं सहलहयात निरन्तरता बिइगु धकाः नं स्वंगू दलया नेतातय् दथुइ खँ जूगु खः । न्हूगु संविधान निर्माणया नितिं छगू महत्वपूर्णगु पक्ष जुयाच्वंगु शान्ति प्रक्रिया अले शान्ति प्रक्रिया पूवंकेगु नितिं महत्वपूर्ण जुयाच्वंगु सेना समायोजनया बारे ताः ई न्ह्यःनिसें माओवादी व कांग्रेसया थःथःगु अडान जुयाच्वंगु खः ।