सहमतिं बजेट हयेगु स्वंगू दलया निर्णय

येँ (झीगु स्वनिगः)

प्रधानमन्त्री निवास वालुवाटारय् म्हिगः आइतवाः जूगु स्वंगू दलया शीर्ष नेतातय्गु मुँज्याय् सहमति कथं हे न्हूगु आर्थिक बर्षया बजेट हयेगु धकाः निर्णय याःगु दु । शान्ति प्रक्रिया पूवंकेगु नितिं गुगु कथं न्ह्याः वनेगु धकाः सहलह ब्याकेगु नितिं च्वंगु उगु मुँज्याय् अथे स्वंगू दलया शीर्ष नेतातय्गु दथुइ सहमति जूगु खः । उगु मुँज्याय् एकीकृत माओवादीया नायः पुष्पकमल दाहाल प्रचण्ड, माओवादीया न्वकुपिं मोहनबैद्य किरण व नारायणकाजी श्रेष्ठ प्रकास, नेपाली कांग्रेसया सभापति सुशील कोइराला, उप सभापति नापं संसदीय दलया नेता रामचन्द्र पौडेल व रामशरण महत्त अथे हे एमालेया नायः नापं प्रधानमन्त्री झलनाथ खनाल, न्वकु बामदेव गौतम व महासचिव इश्वर पोखरेल नापं मेमेपिं नेतातय्सं नं ब्वति कयादीगु खः ।

स्वंगू दलया दथुइ वंगु जेठ १४ गते संविधानसभाया म्याद स्वला थप यायेगु नितिं धकाः न्यागू बुँदाया सहमति जूगु खःसा उगु सहमति लिपा स्वंगू दलया शीर्ष नेतातय्गु दथुइ म्हिगः न्हापांखुसि मुँज्या च्वंगु खः । न्यागू बुँदाया सहमति कार्यान्वयन यायेगु नितिं धकाः अथे मंकाः मुँज्या जूगु खः । प्रधानमन्त्री झलनाथ खनालया विशेष कुतलय् अथे स्वंगू दलया शीर्ष नेतातय्गु दथुइ आइतवाः मुँज्या जूगु खः । मुँज्याय् राजनीतिक गतिरोध अन्त्यया नितिं दलतय्गु दथुइ पुचः पुचः दयेकाः सहलह ब्याकाः वनेगु नापं स्वंगू दलया दथुइ लगातार मुँज्या च्वनाः वनेगु खँय् सहमति जूगु दु । नेपाली कांग्रेसया सभापति सुशील कोइराला म्हिगः हे अमेरिका युरोप भ्रमणय् वनेमाःगु जुयाः अथे म्हिगः हे सुथय् ११ बजेनिसें प्रधानमन्त्री निवास वालुवाटारय् मुँज्या च्वंगु खः ।