शीर्ष नेताया बैठक निष्कर्षविहीन
येँ (सन्ध्या टाइम्स)/प्रमुख स्वंगू दलया शीर्ष नेतातय्गु दथुइ थौं सुथय् प्रधानमन्त्री निवास वालुवाटारय् च्वंगु बैठक विनानिष्कर्ष क्वचाःगु दु। माओवादी लडाकु समायोजनया बारे एकीकृत माओवादी व कांग्रेसं थःथःगु अडान तयेवं बैठकं छुं नं निर्णय याये मफुगु खः। न्यागू बुँदाया सहमति कार्यान्वयनया विषयय् नं गम्भीर रुपं सहलह जूगु खः। सरकारय् दुथ्याःगु एकीकृत माओवादी व एमालें न्यागू बुँदाया सहमति कार्यान्वयन मयाःगुलिं हे समस्या ब्वलनाच्वंगु खः धकाः कांग्रेसया नेतातय्सं द्वपं बियाः वयाच्वंगु दु। स्वंगू दलया दथुइ वंगु जेठ १४ गते संविधानसभाया म्याद स्वलाया नितिं थप यायेत न्यागू बुँदाया सहमति जुइ धुंकाः स्वंगू हे दलया शीर्ष नेतातय्गु थौं न्हापांखुसी बैठक च्वंगु खः ।
कोइराला युरोप व अमेरिका भ्रमण नापं वासः यायेत बाःछिया निंतिं थौं हे उखेपाखे वनीगु जुयाः स्वंगू दलया शीर्ष नेतात एकीकृत माओवादीया अध्यक्ष प्रचण्ड, कांग्रेसया सभापाति सुशील कोइराला व एमालेया अध्यक्ष नापं प्रधानमन्त्री झलनाथ खनालया दथुइ गम्भीर बैठक च्वंगु खः ।
