हाकनं मेगु जासुसी उपन्यास

नेपालभाषाया न्हापांम्ह जासुसी उपन्यासकार राज साय्मिया हाकनं मेगु जासुसी उपन्यास पिहां वःगु दु - 'मखुगु सत्य'। मूपाहां उपन्यासकार मथुरा साय्मिं शुक्रवाः छगू समारोहया दथुइ उगु उपन्यासया विमोचन यानादिल। प्रकाशक ईलोहं प्रकाशनया ग्वसालय् उगु ज्याझ्वः जूगु खः। सफू विमोचन यासें भाजु साय्मिं धयादिल, 'उपन्यास बांलाः व बांमलाः धइगु खँ च्वमिया ल्हातय् जुइ मखु पाठकया ल्हातय् जुइ ।'

च्वमि राज साय्मिं जासुसी उपन्यास छगू कथं बौद्धिक कासा हे खः धासें अनुसन्धानया विधि हे जासुसी कला खः धयादिल। वय्कलं थौं न्हियान्हिथं आपराधिक गतिविधि अप्वयाच्वंगु इलय् थुज्वःगु साहित्यया महत्व अप्वः दु धासें नेपालभाषाया सफू ब्वनीपिनिगु ल्याः अप्वयेकेगु हे थुगु सफू च्वयागुया मू आज्जु खः धयादिल ।

अर्थ पिथना प्रकाशनया नायः रमेशकाजी स्थापितं भाषा प्रचारया निंतिं जासुसी उपन्यास थेंजाःगु साहित्य अप्वः पाय्छि जू धासें थौंकन्हय् टीभी व एफएम थेंज्याःगु संचार माध्यमया कारणं न्हूगु पुस्तां नेवाःभाय्पाखे चिउताः तयाहःगु लसताया खँ खः धयादिल। 'मखुगु सत्य' उपन्यास सत्य सत्य हे जुइ धकाः भाःपियाच्वंसां नं दोषी मखुम्हेसिनं दोष फयेमालीगु बाखंयात राजु, रेखा व राधा स्वम्ह पात्रतपाखें अभिव्यक्त यानातःगु दु ।

च्वमि राज साय्मिया न्हापांगु उपन्यास 'पर्दा भित्रको रहस्य', निगूगु 'मृत्यु महल' खःसा स्वंगूगु उपन्यास 'यःम्ह शत्रु' नेपालभाषाया न्हापांगु जासुसी उपन्यास खः। च्वमिं आः नेपालभाषाया मेगु जासुसी उपन्यास 'ग्यानापुगु छेँ' च्वयाच्वनागु जानकारी नं बियादीगु दु। थुगु सफूया पाठक प्रतिक्रिया स्वयाः जक मेगु उपन्यास पिकायेगु खँ कनादिल ।

विमोचन ज्याझ्वः ईलोहं प्रकाशनया नायः नरेशवीर शाक्यया सभापतित्वय् जूगु खः ।