थौं देय्न्यंकंया गाविस ठप्प
येँ (सन्ध्या टाइम्स)/निजामति कर्मचारी गाविस कर्मचारी संघया उपाध्यक्ष यज्ञराज उपाध्यायया हत्याया विरोधय् थौं देय्न्यंकंया गाविस बन्द याःगु दु। संघया केन्द्रीय दुजः नारायण क्षेत्रीं संघया उपाध्यक्षया हत्याया विरोधय् थौं देय्न्यंकंया गाविसया ज्या ठप्प यायेगु जुइ धकाः धयादीगु दु ।
गाविस कर्मचरी संघं उगु हत्या काण्डय् संलग्नपिंत तत्काल ज्वनाः कारवाही यायेमाःगु, मदुम्ह कर्मचारीयात सहिद घोषणा यायेमाःगु, मदुम्हेसिया छेँजःपिंत क्षतिपूर्ति बीमाःगु माग याःगु दु। छुं दिं न्ह्यः जक अपहरणय् लाम्ह संघया उपाध्यक्ष यज्ञराजयात कन्चनपुरया नेपाल-भारत सीमा लागाय् स्यानाः वांछ्वयातःगु अवस्थाय् वंगु शुक्रवाः लुयाः वयेवं संघं हत्याया विरोधय् संघर्षया ज्याझ्वः घोषणा याःगु खः। यदि थःपिनिगु माग पूरा मजुल धाःसा अझ सशक्त आन्दोलन यायेगु जुइ धकाः नं संघं ख्याच्वः बिउगु दु ।
