राज्य पुनर्संरचनायात ध्वस्त यायेगु कुतः

राज्य पुनर्संरचना सम्बन्धी प्रतिवेदनयात म्वाःसां म्वाःसां विवादास्पद दयेकाः उकियात अलपत्र याना छ्वयेगु षडयन्त्र कथं आः हानं कार्यदल गठन यानाः उकियात छलफल याके बिउगु दु। राज्य पुनर्संरचना बारे चिउताः प्वंकेत थीथी राजनीतिक पार्टीया शीर्ष नेतातय् छेँय् छेँय् डेलिगेशन वंपिं नेवाः लगायत जनजाति आन्दोलनया न्ह्यलुवातलिसे खँ ल्हासें वय्कः शीर्ष नेतातय्सं अझ नं थ्व विषयय् 'व्यापक छलफल' यायेगु थःपिनि 'सोच' दु धकाः हास्यास्पद बिचाः न्ह्यःने तयेगु यानाच्वंगु दनि। छखे भदौ १ गते संविधानया न्हापांगु मस्यौदा पित बीगु धकाः कार्यतालिका दयेकेधुंकूगु दुसा मेखे राज्य पुनर्संरचना बारे नकतिनि 'व्यापक छलफल' या बिचाः नेतातय् दिमागय् वयाच्वन तिनि। वास्तवय् राज्य पुनर्संरचना सम्बन्धी प्रतिवेदनय् विवाद पिहां वयाच्वंगु अथें मखु धइगु खँ नेतातय्पाखें अभिव्यक्त जुयाच्वंगु थुज्वःगु धापूतय्सं बांलाक हे क्यं ।

राज्य पुनर्संरचना प्रतिवेदनय् पिहां वःगु विवाद बारे सहलह ब्याकेत धकाः उपसमितिपाखें छगू कार्यदल गठन याःगु दु। कार्यदलय् एमाले व कांग्रेसं छ्वया हःपिं दुजःपिं जिउसा संघीय व्यवस्थाया हे विरोध याइपिं, मखुसा देय्या फुक्क जाति भाषायात राज्य पुनर्संरचना यानाः अधिकार बीमाः धइगु बिचाः मदुपिं। अन दुने हे थुकिया बारे तःधंगु विवाद सिर्जना जुयाः दुगु विवाद ज्यंकीगु मखु बरु मदुगु विवाद उत्पादन यायेगु ज्या जक मजुइ धाये मफु। विवादयात ज्यंकेगु मखु, अझ विवादास्पद दयेकाः राज्य पुनर्संरचनायात ध्वस्त याना छ्वयेगुपाखे राजनीतिक नेतातय्सं यानाच्वंगु थ्व षडयन्त्रया लिच्वः विध्वंशक जुइगु खँय् शंका मदु ।

More Stories Like this