इलामय् 'नेवाः धर्म' च्वकीगु
नेवाः देय् दबू, इलाम जिल्ला समितिया ग्वसालय् झिंछक्वःगु राष्ट्रिय जनगणना २०६८ विषयस वंगु ने.सं. ११३१ तछलाथ्व द्वादशी कुन्हु छन्हुया जनचेतना ज्याझ्वः यात ।
नेवाः देय् दबू, इलाम जिल्ला समितिया नायः युद्ध प्रसाद बैद्यया नायःसुइ जिल्ला विकास समिति इलामया सभाकक्षय् न्ह्यागु उगु ज्याझ्वलय् केन्द्रीय दुजः पूर्णकृष्ण श्रेष्ठ मूपाहाँ कथं झायादीगु खःसा नेपाल आदिवासी जनजाति महासंघ जिल्ला समन्वय् परिषदया छ्यांजे राजेश राई, तामाङ्ग घेदुङ्गया नायः छिकि तामाङ्ग, नेपाल मगर संघया प्रतिनिधि सरिता मगर आदिपिंसं ब्वति कयादीगु खः । ज्याझ्वलय् न्हापांगु ब्वय् नेवाः देय् दबू इलाम जिल्ला समितिया मूछ्यांजे कमल श्रेष्ठं राष्ट्रिय जनगणनाय् आदिवासी व निगुगू ब्वय् इलामय् नेवाः देय् दबू धइगु विषयस ज्यापौ न्ह्यब्वयादीगु खः ।
नीनिगू गा.वि.स. व इलाम नगरपालिका नापं याना मुक्कं ८० म्हसिनं ब्वति कयादीगु उगु ज्याझ्वलय् सकल नेवाःतय्सं थःगु मांभाय् 'नेवार भाषा' च्वकेगु थःगु जात व जाति 'नेवार' च्वकेगु खँय् सहलह जूगु खः ।
थःगु बिस्कं भाषा, संस्कृति, लिपि, दुपिं झी नेवाःतय्सं हनाच्वनागु धर्मया खँय् नं दुग्यंक सहलह जूगु खः । झी नेवाःतय्सं हनाच्वनागु धर्म व नेवाः दर्शन नेपालय् हनाच्वंगु गुगु नं धर्म व दर्शन नापं ज्वःमलाःगु हुनिं जनगणना काःवइगु इलय् 'नेवाः धर्म' धकाः ब्यागलं हे धर्म च्वकेमाःगु खँय् सहमत जूगु खः ।
अथेहे 'नेवाः धर्म' च्वकेगु खँय् थनया स्थानीय एफ.एम. रेडियोपाखें नं प्रचारप्रसार यायेगु नापं नेवाः देय् दबू केन्द्र पाखें नेपाःया थीथी जिल्लाय् च्वनाच्वंपिं नेवाः समुदायपिंत नं 'नेवाः धर्म' च्वकेगु खँय् चेतना थनेया निंतिं इनाप यायेगु खँ क्वःछ्यू खः ।
News Location:
More Stories Like this
कन्याम इलामय् नेपालभाषा कक्षा न्ह्यात धिमे बाजं व भाषा प्रशिक्षण ज्याझ्वः क्वचाल थुर्पुय् स्वक्वःगु लाखे प्याखँ धेधेबल्ला ओखलढुंगाय् नेपालभाषा कक्षा क्वचाल नेवाः देय् दबू ओखलढुंगा तदर्थ समिति स्वन
