'मखुगु सत्य’या उलेज्या

येँ (झीगु स्वनिगः)

वंगु शुक्रवाः नेपालभाषाया न्हापांम्ह जासुसी उपन्यासकार भाजु राज साय्मियागु न्हूगु जासुसी उपन्यास "मखुगु सत्य" या पितब्वज्या जुल । मथुरा साय्मियागु सभापतित्वय् भाजु राज साय्मियागु उपन्यासया उलेज्या जूगु खः । भाजु राजसाय्मियागु निगूगु जासुसी उपन्यासकथं थ्व मखुगु सत्य पिहांवःगु खः । नेपालभाषाया ख्यलय् दकलय् न्हापां जासुसी उपन्यास पिकयाः वय्कलं पलाः न्हृयाकादीगु खः । थौं स्वयाः ३५ दा न्हृयः ने.सं.१०९३ चउलागा स्वांयापुन्हि कुन्हु नेपालभाषा ख्यलय् दकलय् न्हापां "योम्ह शत्रु" नांयागु उपन्यास ज्वनाः पिलुहृवःगु खः ।

वय्कलं खस भाषं पर्दाभित्रको मान्छे, मृत्युको महल नांयागु उपन्यास पिथनादी धुंकूगु दुसा मृत्युको महल च्वयेत्यंगु इलय् नातीवज्र वज्राचार्यया इनापकथं नेवाः भासं भाय्हिलाः "योम्ह शत्रु" पिथनादीगु खः । नेपालभाषाया ख्यलय् थौंतक मुक्कं स्वंगू जासुसी उपन्यास पिदंगु दु । दकलय् न्हापां राज साय्मियागु योम्ह शत्रु -१०९३), अनं प्रकाश वज्राचार्ययागु हिंबुलातःगु पौ -ने.सं.११०३) व आःवयाः हाकनं राज साय्मियागु मखुगु सत्य यानाः स्वंगू उपन्यास पिदंगु दु ।

ओलम्पस क्लब, भवन ओमबहाःय् जूगु थुगु ज्याझ्वलय् जनकवि दुर्गालाल श्रेष्ठ, पद्मरत्न तुलाधर, त्रिरत्न मानन्धर, नरेशवीर शाक्य व च्वमि भाजु राज साय्मियागु उपस्थिति दुगु खः । च्वमि भाजुपाखें पाहांपिन्त खादा क्वखायेकुसें ज्याझ्वःया उलेज्या यानादीगु खःसा सफूया उलेज्या भाजु मथुरा साय्मिं यानादीगु खः । ईलोहं प्रकाशनया लुखां थुगु सफू पिदंगु खः ।