इलय्हे वजेट हयेमाः

सत्तारुढ एकीकृत नेकपा -माओवादी) एमाले व फोरम स्वंगू दलया दथ्वी वजेट इलय्हे हयेत खल्हावल्हा जूगु दु । छलफल लिपा प्रतिपक्षय् च्वनाच्वंम्ह नेपाली कांग्रेस लगायत दलत नाप नं सहलह व्याकाः वजेट थ्वहे लां हयेगु खँय् सहमत जूगु दु । उखे नेपाली कांग्रेसं नं सहमतिं हे वजेट हयेमाःगु खँय् बहः विया वयाच्वंगु दु । तर उयागु सहमति धयागु मेगुहे दु व खः वर्तमान प्रधानमन्त्री व एमालेया नायः झलनाथ खनालया प्रधानमन्त्रीत्वय् दयेकूगु सरकारं राजिनामा वियाः नेपाली कांग्रेस सहित न्हूगु सरकार दयेकाः जक वजेट हयेमाःगु तर्क न्ह्यःने हयाच्वंगु दु । थ्व ज्या धाये गुलि अःपु व्यवहारयय् छ्यले उलिहे थाकूगु खँ खः । संविधानसभाया म्याद तनां न्यागू वुंदे सहमति कथं न्ह्यःने वनाच्वंगु राजनीतिक पििरस्थितिइ सत्ता पक्ष व प्रतिपक्षया दथ्वी जूगु सहमति व समझदारी उलि क्वातु मजू । स्वलाया दुने पूवनेमाः धयातःगु छुं खँत मध्ये छुं छुं पूवंसां कांग्रेसं धाःथे जुइगु सम्भव मदु ।

व्यक्ति सुरक्षाया नितिं व्यवस्था जुयाच्वंगु निगूकथंया सुरक्षा व्यवस्था चीकाः छगूकथंया जक सुरक्षाय् यंकेगु ज्या जूसां व्यवहारय् छु समस्यात खनेमदुगु मदु । थ्वहे नाप स्वाका जनसेनाया ल्वाभः कन्टेनरय् तयाः उकिया ताःचा विशेष समिति वा सरकारयात लःल्हायेगु ज्या आः थत्थे सम्भव मदु । संविधान च्वयेगु ज्याया ग्यारेन्ति मजूतले थ्व ज्या उलि याउँक जुइमखु । संविधान च्वज्या छख्य तयाः, शान्ति प्रकृयाया मू मुद्दात जुयाच्वंगु राष्ट्रिय सुरक्षा नीतिं लगायत न्ह्यसः म्हिगः गन दु थौं नं अनहे दु । उकियात हे स्वानाः वइगु सेनायात लोकतान्त्रिकरण यायेगु वया नं न्ह्याःगु हे मदु । संविधानसभाया म्याद तनेगुया नारक दुने जुयाच्वंगु थुज्वःगु समस्यातय्त छु गुकथं समाधान यायेगु खँय् प्रतिपक्षतय्के ठोस धारणा दुगु खनेमदु ।

तर नं वजेट थ्वहे लां हयेगु जरुरी जुइ । सरकारयात ज्या यायेत इलय् वजेट हयेमाः । देशभर विकास निर्माणयात प्रतिकुल असर मत्वःतेगु व मलाकेगु खःसा इलय् वजेट हयेहे माः । थ्व खँय् उखे थुखे यायेमज्यू । तर नेपाली कांग्रेसं न्हूगु सरकार दयेकाः जक वजेट हयेकेवीगु धायेगु पाय्छि मखु । आः थत्थे सरकार परिवर्तन जुइ नं मखु, सम्भव नं मदु । उकिं सम्भव मदुगु खँ त्वःताः सहमतिइ वयेमाः । थःगु जिद्दी त्वःता वर्तमान सरकारयात ज्या यायेगु लकस दयेकावीमाः । वजेट इलय्हे पितवीत सकस्या ग्वाहालि यायेमाः । मखुसा सरकारयात मछीनीगुला दुहे दु नापनापं कांग्रेसयातनं हिनीमखु । प्रतिप्षय् च्वनेगुया कर्थ जूगु थनेगु जक मखु माःथाय् माः कथं ग्हालि नं यायेगु खः ।

More Stories Like this