'तःधंम्ह नेतां हे संरक्षण बियाच्वंगु दु’

येँ (झीगु स्वनिगः)

वर्तमान सरकारया नेतृत्व यानाच्वंगु नेकपा -एमाल)ेया बरिष्ठ न्वकु बामदेव गौतमं पत्रकार खिलानाथ ढकालयात आक्रमण याःम्ह परशुराम बस्नेतयात थःगु हे पार्टीया तःधंम्ह नेतां संरक्षण बियाच्वंगु दु धकाः धयादीगु दु। प्रेस चौतारी धनकुटापाखें म्हिगः शनिवाः सदरमुकामय् याःगु पत्रकार भेटघाट ज्याझ्वलय् न्वंवासें अथे बस्नेतयात संरक्षण बिइम्ह तःधंम्ह नेता याकनं हे चीधंम्ह जुइ धकाः ख्याच्वः नं बियादिल ।
अपराधीयात संरक्षण बिइपिं फुक्कं हे अपराधी चरित्रया जुइ धयादिसें नेता गौतमं इमित पार्टीं छानविन यानाः भण्डाफोर यायेगु जुइ धकाः नं ख्याच्वः बियादिल । वय्कलं तप्यंक परशुरामयात संरक्षण यानाच्वंम्ह वरिष्ठ नेता केपी ओली खः धकाः धाःसा धयादीगु मदु तर चाःहिइका वय्कःयात हे द्वपं बियादीगु खः ।

पत्रकारयात आक्रमणया घटना थःगु हे पार्टीया कार्यकर्तातय्गु निर्देशनय् जूगुलिं इमित कानुनी कारवाहीलय् हयेमाः धकाः बहः बियादिल । पार्टी दुने चरम रुपं गुटबन्दी दु धयादिसें वय्कलं थज्वःगु अवस्थायात भिंकाः मवन धाःसा विखण्डनया अवस्था वइ धकाः ख्याच्वः नं बियादिल । पार्टी दुनेया गुटबन्दीं कार्यकर्ता व पार्टीया हित मजुइगु खँ न्ह्यथसें वय्कलं इलय् हे भिंकेगु ज्या यायेमाः धकाः बहः बियादिल । वय्कलं प्रतिकात्मक शैलीं पार्टी दुनेया गुटबन्दी जुगु स्पष्ट यानाः धयादिल 'छगू हे परिवारय् छेँय् दुने यक्व हे भुतू दत, इलय् हे मिले मजुल धाःसा मेगु छेँ दयेकीगु स्वाभाविक जुइ, आः हे अज्वःगु अवस्था धाःसा वःगु मदुनि ।' वय्कलं युवा संघया नायः महेश बस्नेतयात परशुरामया सवालय् सार्वजनिक रुपं न्वंवाये मते धकाः नं धयादिल ।