नेवाःतय्सं तःधंगु जनप्रदर्शन याइगु
येँ (झीगु स्वनिगः)
नेवाः स्वायत्त राज्यया नितिं आन्दोलन यानाः वयाच्वंगु नेवाः स्वायत्त राज्य मंकाः संघर्ष समितिपाखें नेवाः जातीय खलः पुचःत दुथ्याकाः वइगु भदौ १४ गते न्ह्यः येँय् तःजिक जनप्रदर्शन याइगु जूगु दु ।
मंकाः संघर्ष समितिया ग्वसालय् म्हिगः शनिवाः जूगु जातीय खलः पुचःया प्रतिनिधितय्गु तःजिगु भेलां नेवाः स्वायत्त राज्य सुनिश्चितताया नितिं तःजिक जनप्रदर्शन यायेगु धकाः खँ क्वःछ्यूगु खः । अथे हे उगु मुँज्यां नेवाः स्वायत्त राज्ययात कयाः नेवाःतय्गु गां गामय् व त्वाः त्वालय् तक नं अभियानया रुपय् प्रशिक्षण ज्याझ्वः न्ह्याकेगु नितिं मंगलवाः छगू मुँज्या च्वनाः ज्याझ्वःया खाका तयार यायेगु, राज्य पुनर्संरचनाया सवालय् नेवाःतय्गु पहिचान मदयेक राजधानी प्रदेशया रुपय् हयेगु षडयन्त्र जुयाच्वंगुयात विरोध यानाः उकियात नेवाःतपाखें अस्वीकार यायेगु नापं नेवाः स्वायत्त राज्यप्रति नेवाःत छप्पँ छधी जुयाः वनेगु धकाः तकं खँ क्वःछ्यूगु खः ।
