कांग्रेसय् तिब्र रुपं गुटबन्दी

येँ (झीगु स्वनिगः)

नेपाली कांग्रेस दुने गुटबन्दी झन झन तच्वयाः वःगु दु । लिपांगु इलय् वयाः कांग्रेसया संसदीय दलया नेता रामचन्द्र पौडेलयात संसदीय दलया नेतां चीकाः वरिष्ठ नेता शेरबहादुर देउवा जुइगु नितिं कार्यकर्तानिसें नेतातय्त तकं भेला यानाः हःगु दु । संसदीय दलया नेता हे पार्टीपाखें प्रधानमन्त्री जुइ माल धाःसा जुइगु जुयाः आः छुं जुयाः न्हूगु सरकार दयेकेमाल धाःसा कांग्रेसपाखें थः प्रधानमन्त्री जुइगु नितिं नेता देउवां अथे नेता व कार्यकर्तातय्गु ब्यागलं ब्यागलं भेला तकं यानाहःगु दु । विशेष यानाः न्हापा तःक्वः मछि जक मखु याकःचा उम्मेदवार जूगु इलय् नं कांग्रेसया संसदीय दलया नेता रामचन्द्र पौडेल प्रधानमन्त्री पदय् मत्याःगु नापं उकिं यानाः पार्टीया तकं बदनाम जूगु खँ न्ह्यथसें देउवा पक्षधरया नेता कार्यकर्तातय्सं संसदीय दलया नेता हे चीकेत अविश्वासया प्रस्ताव यंकेमाः धकाः बहः बियाहःगु खः । थ्व हे झ्वलय् वंगु शुक्रवाः देउवां याःगु गोप्य भेलाय् जिल्ला सभापति नापं नेतातय्सं संसदीय दलया नेता पौडेलप्रति अविश्वासया प्रस्ताव यंकाः चीकाः देउवायात संसदीय दलया नेता दयेकेमाः धकाः बहः ब्यूगु खः ।

देउवा जुल धाःसा माओवादी व एमालें तकं समर्थन याइगु अवस्था दु धकाः दावी यानादिसें अथे नेता व कार्यकर्तातय्सं अविश्वासया प्रस्तावया नितिं बहः ब्यूगु खः धकाः कांग्रेसया छम्ह नेतां 'झीगु स्वनिगः न्हिपौ' यात कनादीगु दु । पार्टीया पदाधिकारीयात मनोनित यायेगु झ्वलय् तकं संस्थापन पक्ष अर्थात सभापति सुशील—रामचन्द्र पक्षधरं देउवा पक्षधरया बेवास्ता याःगु खँय् नं पार्टी दुने ब्यापक रुपं बहस जुयाच्वंगु दु । कांग्रेस दुने न्हापा नेपाली कांग्रेस व नेपाली कांग्रेस -प्रजातान्त्रिक) एकता जुइ न्ह्यःया नेतातय्गु ल्वापु आः तक नं मतंनि धकाः आःया गुटबन्दीं क्यनाच्वंगु दु धकाः कांग्रेसया नेतातय्सं धयाहःगु दु ।

थौं शीर्ष नेतातय्गु मुँज्या

संविधानसभाया मूमू स्वंगू राजनीतिक दलया शीर्ष नेतातय्गु दथुइ थौं आइतवाः मुँज्या च्वनीगु जूगु दु । वंगु जेठ १४ गते संविधानसभाया म्याद थप याये धुंकाः आः तक नं च्वने मफयाच्वंगु स्वंगू दल एकीकृत माओवादीया नायः पुष्पकमल दाहाल प्रचण्ड, एमालेया नायः नापं प्रधानमन्त्री झलनाथ खनाल व नेपाली कांग्रेसया सभापति सुशील कोइरालाया मंकाःगु मुँज्या थौं च्वनेगु नितिं ज्याझ्वः तयार याःगु दु ।

कांग्रेसया सभापति कोइराला वासः यायेगु नितिं थौं हे अमेरिकाय् वनेमाःगु जुयाः मुँज्या न्हापालाक्क हे च्वनी धाःगु दु । उगु मुँज्याया नितिं प्रधानमन्त्री झलनाथ खनालं माओवादीया नायः प्रचण्डया निवास नयाँबजारय् व कांग्रेसया सभापति कोइराला निवास महाराजगञ्जय् वनाः सहलह ब्याकादीगु खः । स्वंगू दलया स्वम्ह शीर्ष नेतातय्गु दथुइ संविधानसभाया म्याद थप यायेगु नितिं न्यागू बुँदाया सहमति जूगु खःसा व हे सहमति कार्यान्वयनया सवालय् थौंया मुँज्या केन्द्रीत जुइगु नापं ठोस खँ पिहां वइगु धकाः अनुमान याःगु दु ।