उपन्यासकार साय्मिया जासुसी उपन्यास

नेपालभाषाया न्हापांम्ह जासुसी उपन्यासकार राज साय्मिया निगूगु जासुसी उपन्यास 'मखूगु सत्य' थौं छगू ज्याझ्वःया दथुइ उपन्यासकार मथुरा साय्मिं विमोचन यानादिल ।

येँया ओलम्पस क्लबय् जूगु उगु ज्याझ्वलय् च्वमि राज साय्मिं उपन्यासकार मथुरा साय्मि गुरु जूगु व वय्कःया हे हःपालं नेपालभाषां जासुसी उपन्यास च्वयागु खँ कनादिल ।

अर्थ प्रकाशन प्रा.लिया कजि रमेशकाजी स्थापितं नं न्ववानादीगु उगु ज्याझ्वः ईलोहं प्रकाशनया प्रबन्ध निर्देशक नरेशवीर शाक्य सभाध्यक्षताय् जूगु खःसा ज्याझ्वलय् जनकवि दुर्गालाल श्रेष्ठ, लुम्बिनी बौद्ध विश्व विद्यालयया उपकुलपति प्रा. डा. त्रिरत्न मानन्धर, नेपालभाषा मंकाः खलः येँया नायः पद्मरत्न तुलाधर लिसें आपालं नेवाः व्यक्तित्वतय् उपस्थिति दुगु खः ।

उपन्यासकार राज साय्मिं थ्व स्वयां न्ह्यः 'यम्ह शत्रु' ने.सं. १०९३ गुलांय पिदंगु खः । वय्कःया खस भाषां पर्दाभित्रको मान्छे मृत्युको जन्म आदि यानाः स्वंगू जासुसी उपन्यास पिदनेधुंकूगु दु । वय्कलं च्वयादीगु खस भाषाया मृत्युको जन्म हे नेपालभाषां उल्था यानाः यःम्ह शत्रु उपन्यास पिथनादीगु खः ।

More Stories Like this