कारवाही यायेगु गौतमया ख्याच्वः
थौं एमालें थःगु धारणा पित बीगु
येँ (सन्ध्या टाइम्स)/एमालेया वरिष्ठ उपाध्यक्ष वामदेव गौतमं एमाले अपराधीत संरक्षण याइगु पार्टी मखु धयादिसें पार्टी दुने दुपिं आपराधिक मनोवृत्ति समाप्त याये मफुत धाःसा पार्टी हे समाप्त जुइ धयादीगु दु ।
अपराधीत छुं ईया निंतिं सुलाः च्वनेफुसां न्ह्याबलेंया निंतिं सुलाच्वने फइ मखु धकाः नं वय्कलं धयादिल। धनकुटाय् एमाले जिल्ला परिषदय् ब्वति काः वनेगु झ्वलय् थौं विराटनगरय् संचारकर्मीतलिसे खँल्हासें वय्कलं अथे धयादीगु खः ।
नेता गौतमं पत्रकारयात आक्रमण याःपिंत कारवाही यायेमाः धासें पार्टी दुने सुलाच्वंपिं अपराधीतय्त पार्टीं हे कानूनया दायराय् हयेमाः धकाः नं धयादिल। वय्कलं पार्टीया युवा संघ दुने समस्या दु धइगु खँयात नं अन स्वीकार यानादिल। तर अपराधी थःनाप दु धाइम्हेसित नं कारवाही जुइ धयादिल। वय्कलं धयादिल, 'एमाले दुने सुलाच्वंपिं अपराधीतय्त कानूननया दायराय् हये हे माः ।'
पार्टीया निर्णययात तकं बेवास्ता यानाः युवा संघया अध्यक्ष महेश बस्नेतं थः पिहां वये मखु धाःगु बांलाःगु संस्कार मखु धासें नेता गौतमं पार्टी दुने थीथी कथंया संस्कार दुपिं नेता व कार्यकर्तात दुगुलिं हे थुज्वःगु प्रवृत्ति खने दयावःगु खः धयादिल ।
थ्वहे दथुइ पत्रकार खिलानाथ ढकालयात थःगु भ्रातृ संगठन युवा संघया कार्यकर्तातय्सं आक्रमण याये धुंकाः ब्वलंगु परिस्थिति बारे सहलह ब्याकेत थौं एमालेया प्रचार विभागया बैठक च्वनाः आधिकारिक धारणा सनिलय् पित बीगु जूगु दु। बैठक लिपा पत्रकार सम्मेलन हे यानाः पार्टीया धारणा पित बीगु खँ धाःगु दु। उगु घटनायात कयाः एमालेयात तसकं ज्या मछिनावःगुलिं थौं पार्टीया आधिकारिक धारणा हे पित बीत्यंगु खः ।
पत्रकारयात आक्रमण याःगु द्वपनय् युवा संघया निम्ह कार्यकर्तायात ज्वना तःगु, मू योजनाकार पर्शुराम बस्नेत आः तकं फरारा जुयाच्वंगु नापं पर्शुराम थःनाप दु ज्वने फुसा ज्वनाः क्यँ धकाः प्रहरी प्रशासनयात हाथ्या बिउम्ह युवा संघया नायः महेश बस्नेतयात ज्वने धुंकाः ब्वलंगु अवस्था, आः तक नं बस्नेत हिरासतं पिहां वयेत तयार मजुयाच्वंगु विषयय् सहलह ब्याकाः पार्टीया आधिकारिक धारणा थौं हे पित बीगु जूगु दु ।
