'कांग्रेस नेवाः राज्य व पहिचानया विरोधी मखु'

येँ (सन्ध्या टाइम्स)/प्रमुख प्रतिपक्षी दल नेपाली कांग्रेसया सभापति सुशील कोइरालां कांग्रेस पहिचानया आधारय् संघीय राज्य व नेवाः स्वायत्त राज्यया विरोधी मखु धयादीगु दु। नेवाः स्वायत्त राज्यया निंतिं संघर्ष याना वयाच्वंगु नेवाः स्वायत्त राज्य मंकाः संघर्ष समितिं थौं सुथय् कोइराला निवास महाराजगञ्जय् वनाः ७ बुँदाया ज्ञापनपत्र लःल्हाः वंगु इलय् वय्कलं अथे धयादीगु खः ।

सभापति कोइरालां कांग्रेसं नेवाः राज्य व पहिचानया विरोध याइ मखु तर थकिं लाइगु लिच्वः, मेमेगु देशय् जातीय द्वन्द्व जूगुलिं गम्भीर जुयाः सहलह ब्याकेमाःगु अवस्था दु धयादिल। वयक्लं नेवाःतय्गु थुगु मागयात पार्टीइ ब्यापक सहलह ब्याकेगु नं धयादिल। नेवाः स्वायत्त राज्य मंकाः संघर्ष समितिया नायः गजेन्द्र मानन्धरं ज्ञापन पत्र लःल्हानादीगु उगु ज्याझ्वलय् मंकाः संघर्ष समितिया सचिवालय कजि मल्ल के. सुन्दरं नेपाःया राजनीतिक इतिहाय् हिउपाःया नितिं न्ह्याबलें नं निर्णायक भूमिका म्हिता वयाच्वंपिं स्वनिगःया आदिवासी नेवाःत खः आः राज्यया पुनर्संरचना जुइगु इलय् नेवाः राज्य मदइगु जुल धाःसा नेवाःतय्गु निंतिं तःधंगु अन्याय जुइ धयादिल ।

कांग्रेसं नेवाः राज्यया थासय् राजधानी प्रदेश यानाः ७ प्रदेशया प्रस्ताव हयाच्वंगुप्रति नेवाःतय्गु गम्भीर ध्यानाकर्षण जूगु दु धासें वय्कलं आःया अवस्था धइगु संघीय राज्यया सवालय् निर्णायक ई जूगुलिं छलफल यायेगु सिबें निर्णय यायेगु ई जुइधुंकल धयादिल। अथे हे राजधानी प्रदेश धइगु केन्द्र शासित प्रदेश जुइगु जुयाः व नेवाःतय्गु नितिं स्वीकार्य जुइ मखु धकाः नं धयादीगु खः ।