बजेट हयेगु नितिं स्वंगू दलया सहमति
येँ (सन्ध्या टाइम्स)/वर्तमान सरकारय् दुथ्याःगु मूमू स्वंगू राजनीतिक दल एकीकृत माओवादी, एमाले व मधेसी जनअधिकार फोरमया शीर्ष नेतातय् दथुइ इलय् हे न्हूगु बजेट हयेगु खँय् सहमति जूगु दु। थौं सुथय् प्रधानमन्त्री निवास वालुवाटाय् प्रधानमन्त्री नापं एमालेया अध्यक्ष झलनाथ खनाल, माओवादीया अध्यक्ष प्रचण्ड व फोरमया अध्यक्ष नापं उपप्रधानमन्त्री उपेन्द्र यादव दथुइ उगु सहमति जूगु खः ।
बजेट इलय् हे हयेगु नितिं प्रमुख प्रतिपक्षी नेपाली कांग्रेस नापं मेमेगु दलया नेतातलिसे नं सहलह ब्याकेगु खँय् नं स्वम्ह नेताया दथुइ सहमति जूगु खः। राजनीतिक खिंचातानीया कारणं न्हूगु बजेट हयेगु सवालय् अलमल जुयाच्वंगुलिं सरकारय् दुथ्याःगु दलया शीर्ष नेतातय् दथुइ अथे सहलह ब्याकूगु खः। अथे स्वम्ह शीर्ष नेतातय्गु दथुइ वार्ता याये न्ह्यः प्रधानमन्त्री खनाल व माओवादी अध्यक्ष प्रचण्डया दथुइ सहलह जूगु खः। उगु सहलह ज्याझ्वलय् माओवादी, कांग्रेस व एमालेया दथुइ जूगु न्यागू बुँदाया सहमति कार्यान्वयन यायेगु, शान्ति प्रक्रिया पूवंकेगु, इलय् हे न्हूगु संविधानया एकीकृत मस्यौदा पित हयेगु नापं समसमायिक राजनीतिया विषययात कयाः तकं सहलह जूगु खः ।
