थनिनिसें जनगणना

येँ (सन्ध्या टाइम्स)/शीतल निवासय् थौं सुथय् ८ बजे राष्ट्रपति डा. रामवरण यादवया विवरण संकलन यासें ११ क्वःगु राष्ट्रिय जनगणना आरम्भ जुल। थनिंनिसें देय्न्यंकं हे छक्वलं जनगणना न्ह्याकूगु दु। राष्ट्रपतिया परिवारया लगत संकलन यायेत केन्द्रीय तथ्याङ्क विभागया महानिर्देशक उत्तमनारायण श्रेष्ठ थःहे राष्ट्रपति निवास झाःगु खः। विभागं जनगणनाया निंतिं ८,५०० सुपरिवेक्षक व ३४,००० गणक खटे याःगु दु। असार १३ गते तक जनगणना जुइ। नेपालय् १९६८ निसें जनगणना कायेगु शुरु याःगु खः। झिदँ पतिकं जनगणना कायेगु याना वयाच्वंगु दु। लुमंकेबहः जू न्हापा न्हापा नं जुजुपिनिगु हे विवरण कयाः जक जनगणना शुरु याना वयाच्वंगु खः ।