वाईसीएल शैलीइ एमालेया ल्याय्म्हत

एमाले समर्थित ल्याय्म्हतय् संगठन युवा संघया नायः महेश बस्नेतयात ज्वंगु खँयात कयाः संघया कार्यकर्तातय्सं देय्न्यंकं तोडफोड यानाः हिंसाया वातावरण ब्वलंकेत स्वयाच्वंगु खनेदु। एमाले स्वयम् हे सत्ताय् दुगु इलय् एमालेया हे कार्यकर्तातय्सं क्यंगु थ्व उद्दन्तं प्रधानमन्त्री झलनाथ खनालयात समस्याय् लाकीगु खनेदुसा थ्व पूरा ज्या प्रम खनालयात समस्याय् लाकेगु हे नियतं पार्टी दुनेया गुगुं गुटं सञ्चालन यानाच्वंगु आशंका यायेगु थाय् नं यक्वं पिहां वयाच्वंगु दु ।

महेश बस्नेतयात ज्वंगु मेता कारणं मखु। विराटनगरय् कार्यरत छम्ह पत्रकारयात बाम्ह सिक्क दायाहःम्ह वहे संगठनया छम्ह कार्यकर्तायात प्रहरीं ज्वनेत स्वःबलय् प्रहरीयात ग्वाहालि यायेगु ला त्वःता हे छ्वये, अःखतं अभियुक्तयात जिं संरक्षण बिया तयागु दु, फुसा ज्वनाः क्यँ धकाः हाथ्या बिउगु कारणं वयात ज्वंगु खः। उकिं प्रकरणय् एमालेया ल्याय्म्हतय्सं गुगु हाथ्या बिल, थ्व प्रहरीयात जक मखु देय्या प्यंगूगु अंग जुयाच्वंगु पत्रकारितायात तकं हाथ्या बिउगु खः। थुकियात थ्वहे अर्थय् व्याख्या यायेमाः ।

महेश बस्नेत व वयागु 'ग्यांङ्गं' देय्या प्रहरी व पत्रकारितायात खुल्ला रुपं बिउगु हाथ्यां मुलुकय् व्याप्त अराजकताया 'लेबुल' नापे यायेत नं बांलाक हे ग्वाहालि याःगु दु। एमालेया नेतातय्सं छखे माओवादीया वाईसीएल भंग यायेमाल धकाः माग यायेगु, मेखे थःहे कार्यकर्तातय्त 'भाई वाईसीएल' दयेकेगु गुगु अभ्यास थौं यानाच्वन, उकिं अन्ततः एमालेयात हे हानी याइगु खँयात थ्व सम्पूर्ण लीला रचना याःपिं नेतातय्सं बांलाक थुइकेमाः ।

More Stories Like this