मन्त्री परिषद्यात विपक्षी दयेकाः म्हिगः नं बहस

येँ (झीगु स्वनिगः)

सञ्चारमन्त्री अग्नीप्रसाद सापकोटा व मन्त्री परिषद्यात विपक्षी दयेकाः सर्बोच्च अदालतय् लाःगु रिट दथुइ म्हिगः निन्हुया दिं नं बहस जूगु दु । म्हिगःया बहसय् अधिवक्तात कृष्णप्रसाद सापकोटा, सबिता भण्डारी, लब मैनाली, विमल ढकाल, दीनमणी पोखरेल, श्रीकृष्ण सुबेदी, बालकृष्ण देवकोटा, रबिन सुवेदी, गोपाल सिवाकोटी चिन्तन, मोहम्बद शेख अब्बास लगायतं रिटया विपक्षय् बहस याःगु खः । वय्कःपिंसं रिट दर्ता यायेगु हे आवश्यक मदुगु दाबी यासें अन्तरिम आदेश जारी यायेम्वाःगु दलील न्ह्यब्वःगु खः । द्वन्द्वकालया मुद्दात उच्च स्तरिय सत्य निरुपण लिसे मेलमिलाप आयोगं जक स्वइगु अन्तरिम संविधानय् स्पष्ट न्ह्यःथनातःगुलिं नं फौजदारी अदालती प्रक्रियापाखें वनेमाःगु माग यायेगु संविधान अःखः जूगु वय्कःपिनिगु दाबी खः । जनता शान्ति व मेलमिलाप चाहय् जूगु अवस्थाय् सुं सुं मनूतय्सं थःगु निहीत स्वार्थया नितिं रिट दायर याःगु दाबी यासें वय्कःपिंसं अन्तरिम आदेश जारी जूसा समग्र शान्ति प्रक्रियायात हे प्रभाव लाकीगु न्ह्यःथनादीगु खः ।