हेटौडा कापःया जग्गा औद्योगिक क्षेत्रयात बिइगु

येँ (झीगु स्वनिगः)

झिंछदा न्ह्यःनिसें बन्द हेटौडा कापः उद्योगया भवन पूर्वाधार व जग्गा सरकारं औद्योगिक क्षेत्र व्यवस्थापन लिमिटेडयात लःल्हायेगु प्रक्रिया न्ह्यःने न्ह्याकूगु दु । मन्त्री परिषद्या बैठकं उद्योगया भवन लगायत भौतिक पूर्वाधार च्यागू करोड झिंनिगू लख भाः कायम यानाः लिमिटेडय् शेयर तयेगु निर्णय याःगु खः । मन्त्री परिषद् प्लान्ट व मेशिनया च्यागू करोड झिंप्यंगू लख तका व कापः उद्योगया नामय् दुगु निसः व न्यय्खुगू रोपनी जग्गा चलन चल्तीया भाःकथं औद्योगिक क्षेत्रयात मीगु निर्णय याःगु खः । २०३२ सालय् पलिस्था जूगु उगु उद्योगं हेटौडा औद्योगिक क्षेत्रया निसः व स्वीखुगू रोपनी जग्गा बालं व निसः व न्यय्खुगू रोपनी जग्गा थःगु नामय् न्यागु खः । सरकारं वइगु असार २२ गतेतक्क कापः उद्योग सम्बन्धी भौतिक पूर्वाधार लगायत जग्गाया फुक्क ज्यात क्वःछीत ईया सीमा क्वःछ्यूगु दु ।

More Stories Like this