उर्जा संकट समाधानया राष्ट्रिय संकल्पय् ब्वति काये :प्राधिकरण

येँ (झीगु स्वनिगः)

नेपाल विद्युत प्राधिकरणं विद्युत चुहावट नियन्त्रण यायेगु ज्याय् थःथःगुपाखें ग्वाहालि यानाः ऊर्जा संकट समाधानया राष्ट्रिय संकल्पय् ब्वति कायेत फुक्कसित इनाप याःगु दु । विशेषयानाः आपालं चुहावट जुइगु वितरण केन्द्रया थीथी फिडरया विद्युत उपभोक्तातय्त प्राधिकरणं बुधवाः सार्बजनिक सुचं पिकयाः ऊर्जा संकट समाधानया राष्ट्रिय संकल्पय् ब्वति कायेत इनाप याःगु खः । यल, ख्वप, मकवानपुर, सिन्धुपाल्चोक, चितवन, पर्सा, मोरङ, सुनसरी, सप्तरी, सिराहा व धनुषा जिल्लाया फिडरतपाखें आपालं विद्युत चुहावट जुइगु यानाच्वंगु दु । अथेहे महोत्तरी, सर्लाही, बारा, रौतहट, नवलपरासी, रुपन्देही, कपिलबस्तु व बर्दिया जिल्लाया फिडरतपाखें नं आपालं विद्युत चुहावट जुइगु यानाच्वंगु दु । प्राधिकरणं पीगू प्रतिशत स्वयाः आपालं विद्युत चुहावट जुइगुयात अप्वः जुइगुकथं कायेगु याः । वइगु झिंन्यान्हुतक्कयादुने नं उगु फिडरतपाखें विद्युत चुहावटय् न्ह्यःथने बहःगुकथं सुधार मजूसा सम्बन्धित फिडरय् मेगु निघौ लोडसेडिङ यायेत बाध्य जुइगु नेपाल विद्युत प्राधिकरणं जानकारी ब्यूगु खः ।

More Stories Like this