हाइटी घोटालाया खँनं न्ह्यःने वल

२९ करोड घोटाला जूगु खँयात कयाः हालैतिनि मुद्दा दायर याःगु लगत्तै शान्ति सुरक्षाया निति हाइटीइ प्रहरीयात माःगु सामानय् नं करौडौंया घोटाला जूगु खँ पिहांवःगु दु । थनिं च्यादँ न्ह्यः प्रहरीं संयुक्त राष्ट्रसंघया हाइटी मिशनया नितिं कमसलया सामान न्यानाः थिकेयक विल दयेकाः भ्रष्टाचार याःगु खः । हाइटीइ थौं नं नेपाःया प्रहरीतय्सं अनच्वनाः ज्या यानाच्वंगु दु । तर इमिसं छ्यलावयाच्वंगु सरसामान व ल्वाभःत फुक्क कमसल व स्तरहन जूगुलिं अनया प्रहरीत तःधंगु रिक्सय् लानाच्वंगु दु । छुंनं इलय् छुं नं जुइफु । हाइटीया मिशनय् प्रहरी व इमित माःगु सामान न्याःवलय् तत्कालिन प्रहरी महानिरिक्षकय् श्यामभक्त थापा खःसा गृह मन्त्रीइ कमल थापा खः । अन कमसलया सामान छ्वःगुयाहे कारणं प्रहरीं करौडौंया मर्मत खर्च यानाच्वने माःगु धाःगु दु ।

२०६० सालय् संयुक्त राष्ट्रसंघं नेपाल प्रहरीत शान्ति मिशनय् छ्वयेत इनाप यायेवं अवलेनिसें हाइटीए प्रहरीतय्सं अन शान्ति व्यवस्था कायम यायेत ज्या यानावयाच्वंगु दु । तर कमसलया सामान छ्वयाः अनज्यायाना च्वःपिं प्रहरीतय्गु जीवनयात संकटय् लाका वःगु दु । कमसलया सामान छ्वयाः अन थप छु छु समस्या पिहांवल व उकिया कारणं सुं प्रहरीया जीवनयात हे खेलवाड तक जूगु दुकि मदु धयागु थप अनुसन्धान यायेमाःगु अवस्था ब्वलंगु दु । नेपाःया प्रहरीत हाइटीइ वंसां अन च्वनेगु व ज्यायायेगु बांलाःगु व्यवस्था मदु व प्रहरीपाखें छ्वःसां अन च्वनाः ज्या यायेवलय् व्यक्तिगतरुपहे च्वनेमाः । हाइटीइया व्यारेक सिस्टम नेपाली प्रहरीतय्गु नितिं न्हापांगु खः । उकिं सामानया व्यवस्थाया नितिं प्रहरी कल्याण कोषं खर्च यानाः छ्वःगु खः । अवले सामान न्यायेगुया ठेक्का नं आःया सुडान काण्डया ठेक्केदार शम्भु भारती व च्यान्टे घिमिरे काःगु खः ।

अवले सामान न्याःगु मध्ये प्यखा पि|mप्य्राकय् जक ८८ लाख भ्रष्टाचार याःगु दु । ८ लाख तूगु पि|mट्याकयात ३० लाखया ल्याखं विल पेश याःगु खः । अथ्यहे लः सफा यायेगुली ३३ लाख घोटाला जूगु अनुमान याःगु दु । ७५ द्वः वंगु प्यंगः लः सफा यायेगु सामान न्यानाः ८ लाखया विल दयेकूगु खः । अथ्यहे २ लाख तूगु जेनेरेटरया ८ लाख पुइकूगु, मोटर या छ्ट -हुक) गुंगः गाडी तयागु बापत ४ करोड स्वयाः अप्वः भ्रष्टाचार याःगु लगायत खँ प्रकाशनय् वःगु दु । हाइटीइ नेपालं छ्वःगु सामान कमसल जूगु कारणं राष्ट्रसंघं शुरइ मछ्यलेत धाःगु खः । अथ्य स्वयांनं सामानयात छ्यलावुला हयेगु यात । तर राष्ट्र संघं अवलेया ध्यबाः नेपाःयात व्यूगु मदुनि । हाइटी मिशनय् छ्वःगु सामानय् भ्रष्टाचार याःपिसंहे सुडान काण्डय् नं भ्रष्टाचार यायेत हःपाः काःगु खः । वंगु निगू घटनाया आधारय् राष्ट्रसंघं नेपाःयात विश्वास मयाइगु अवस्था सृजना जूगु दु ।

More Stories Like this